नेपाल भाषाया पाठ्यक्रम शिक्षा समितियात ल:ल्हात

यें/ नेपालभाषा पाठ्यक्रम निर्माण समितिं छगू तगिं निसें च्यागू तगिं तकया नेपालभाषा पाठ्यक्रमयात बैधानिक रुपं मान्यता बिइगु नितिं म्हिग: साउन २३ गते शुक्रवाः शिक्षा समितियात लःल्हाःगु दु । शिक्षा समितिं थुगु पाठ्यक्रम लागू यायेत अनुमोदनं याये धुंकूगु खँ निर्माण समितिं जानकारी ब्यूगु खः ।
पाठ्यक्रमयात स्तरीय जुइक निर्माण यायेगु झ्वलवय् दकले न्हापां २०७६ पुस १२ गते खुन्हु शिक्षा नापं मेमेगु क्षेत्रय् ज्या याना च्वंपिं थीथी खलःपुचः लिसें आवश्यकता पहिचान यायेगु ज्या याःगु खः । अथेहे निगूगु चरणय् २०७६माघ २४ गते आवश्यकता पहिचानयात विस्तृत रुपं पाठ्यक्रम तयार यानाः प्रवोधीकरण यायेगु ज्यानं याःगु खः । निगूगु चरणं वःगु सुझावकथं स्वंगूगु चरणय् अन्तिम रुप वियाः पित ब्वज्या यायेया नितिं २०७७ असार १४ गते विज्ञतयगु पुचः दथुइ सहलह पूवंके धुंकूगु दु ।
येँ महानगरपालिका शिक्षा समितिपाखें स्थानीय विषय नेपालभाषा पाठ्यक्रम १–८ तगिं तकया पाठ्यक्रम निर्माण समिति नीस्वंगु खः । उगु समितिइ प्रा.डा. चुन्दा बज्राचार्य, पूर्व प्रधानाध्यापक बरुणप्रसाद वैद्य, प्रा. मदन रत्न मानन्धर व नरेशवीर शाक्य नापं सदस्यसचिव मोती राज खनाल दुथ्याःगु खः।
येँ महानगरपालिकाया उप मेयर हरिप्रभा खड्गीया संयाेजकत्वय् सफू पिथनेगु व स्यनामि ल्ययेगु निगू समिति नीस्वने धुंकूगु खँ धा:गु दु ।

किपा: नेसूके