कडा लकडाउन गर्ने, कर्फ्यु लगाउनेदेखि सिल गर्नेसम्मकाे विज्ञहरुको सुझाव सरकारलाई

काठमाडौं / कोरोना संक्रमण भयावह रुपमा फैलँदै गएपछि सरकारले प्रधानमन्त्री निवास बालुवाटारमा विज्ञहरुसँग परामर्श गरेको छ । करिब साढे चार घण्टा लामाे आजकाे छलफलमा विज्ञहरूबाट लकडाउन कडाइ गर्ने वा २१ दिन ताेकेर कर्फ्यु लगाउने वा संक्रमण बढेका स्थानमा सिल गर्ने र नागरिक उत्तरदायित्व बढाउने जस्ता मिश्रित सुझावहरू प्राप्त भएकाे प्रधानमन्त्रीकाे प्रेस सल्लाहकार सूर्य थापाले बताएका छन् । उनका अनुसार विज्ञहरुले अस्पतालमा पूर्वाधार बढाउन आइसीयू र भेन्टिलेटर उपलब्धता बढाउन पनि जाेड दिइएकाे बताए । बिज्ञहरुबाट आएका सुझावहरू अनुसार सरकारले आवश्यकता अनुसार जायज सुझावहरू कार्यान्वयन गरी अगाडि बढ्ने र कोरोनासँगको लडाइँ लड्ने बताए ।
यसैबीच पत्रकारहरुसँग कुरा गर्दै प्रधानमन्त्री केपी शर्मा ओलीले विदेशबाट आउने नेपालीको परीक्षण गरी प्रमाणित भएपछिमात्र घर पठाइने बताएका छन् । बाहिरबाट आउनेहरु आफै पनि जिम्मेवार हुनुपर्ने उनले बताए । प्रधानमन्त्रीको सरकारी निवास बालुवाटारमा मंगलबार विज्ञहरुसँगको छलफलमा प्रधानमन्त्री ओलीले त्यस्तो बताएका हुन् ।
अहिलेको कोरोना संकट सल्टाउन सबैको भूमिका अनिवार्य रहने उनले बताए । “भयाभह स्थिति छँदैछ, सीमाबाट मान्छे स्वस्फूर्तरुपमा आउन दिने हो भने झन अवस्था विग्रन्छ” प्रधानमन्त्री ओलीले भने, “आउन दिने हो तर परीक्षण गरेर मात्र घर पठाउनुपर्छ, त्यसमा नागरिकले सहयोग गर्नुपर्छ ।
“लकडाउन लगाउँदा किन लगाइस् भन्ने, लकडाउन खोल्दा किन खोलिस् भन्ने गलत मानसिकता साथ टिप्पणी भइरहेको छ” भन्दै प्रधानमन्त्री ओलीले सबैलाई जिम्मेवार बन्न आग्रह गरे । सरकार देश र जनताको स्वास्थ्यमा संवेदनशील रहेको उनले बताए ।
छलफलमा नेपाली काँग्रेसका नेता तथा पूर्वप्रधानमन्त्री शेरबहादुर देउवा तथा जनता समाजवादी पार्टीका अध्यक्ष महन्थ ठाकुर पनि उपस्थित रहेका थिए ।