साया: गाईजात्रा ननिकाल्न काठमाडौं महानगरपालिकाको अनुरोध

काठमाडौं / काठमाडौं महानगरपालिकाले गाईजात्राको दिन काठमाडौंमा साया: याने कि गाईजात्रा निकालेर नगर परिक्रमा नगर्न अनुरोध गरेको छ । कोरोना भाइरस संक्रमणको खतरा रहेको कारण देखाउँदै सदियौंदेखि चलिआएको गाईजात्रा ननिकाल्न उसले अनुरोध गरेको हो । महानगरपालिकाका पर्यटन तथा सम्पदा समितिका संयोजक १८ वडाका वडा अध्यक्ष न्हुच्छेकाजी महर्जनले आज बसेको कार्यपालिका बैठकले गाईजात्रा ननिकाल्न अनुरोध गर्ने बारे निर्णय गरेको जानकारी दिए ।
काठमाडौं उपत्यकाका आदिवासी नेवार समुदायको गाईजात्राको दिन त्यस वर्ष मृत्यु भएका मृतकका घरबाट मृतकको सद्गतिको कामनासहित गाइजात्रा निकाल्ने प्रचलन रहेको छ ।
यसैक्रममा चन्द्रागिरि नगरपालिकाका मेयर घनश्याम गिरीका अनुसार आफ्मो नगरभित्र मृतकका घरबाट गाईजात्रा निकाल्न दिने तर अन्य परम्परागत जात्रा भने गर्न नदिने बताएका छ्न् । चन्द्रागिरी नगर पालिका अन्तर्गत रहेको थानकोट लगायत क्षेत्रमा यस अबसरमा अरु पनि धेरै जात्राहरु परम्परादेखि चलि अएको छ ।
“कोरोना संक्रमण फैलन सक्ने भयका कारण यस प्रकारका जात्राहरुमा रोक लगाउने निर्णय गारेका छौं । ” मेयर गिरिले बताए ।
पाटनमा गाईजात्राको भोलिपल्ट मतया: जात्राको चलन रहेकोमा यसपटक प्रतिकात्मक रुपमा सानो कार्यक्रम मात्र गर्ने योजना रहेको मतया: व्यवस्थापन समितिले जनाएको छ ।
भक्तपुरको अलि फरकको गाईजात्रा पर्व छ । यसलाई तायमचा पिकायेगु भनिन्छ । जुन मृतकको सद्गतिक्को कामना सहित निकाल्ने गरिन्छ । भक्तपुर नगर पालिकाले यसलाई निकाल्न दिने भएको छ ।
तर त्यहाँ मनोरञ्जनका निम्ति निकालिने घिन्तांघिसी ख्याल: (हाँस्यब्यंगपूर्ण सडक नाटक) भने निकाल्न नदिइने भएको छ ।
गोदावरी नगरपालिकाले आउँदो साउन २० गते श्रावण प्रतिपदाका दिन मनाइने गाईजात्रासँग सम्बन्धित अन्य पर्व पूर्णरुपमा स्थगन गर्न अनुरोध गरेको छ ।विश्वव्यापी रुपमा फैलिरहेको कोरोना महामारीले सङ्क्रमितको सङ्ख्या दिनानुदिन बढ्दै गइरहेको अवस्थालाई ध्यानमा राखेर नगरवासीको सुरक्षाका लागि नगरपालिकाले उक्त अनुरोध गरेको हो ।
त्यसैगरी गोदावरीभित्र गाईजात्रा पर्वमा मनाइने मत्या, रोपाइँ, लाखय् कृष्ण र जुग (भगवान) जात्रा सञ्चालन नगर्न आग्रह गरिएको नगरपालिकाका प्रमुख गजेन्द्र महर्जनले बताएका छन् ।, “दिवङ्गत आत्माको शान्त्तिका लागि भीडभाडजन्य कार्य नगरी सम्बन्धित सरोकारवालालाई मात्र गाईजात्रामा समावेश हुन अपिल गर्दछौं ।”
उनले भने यसवर्ष सामाजिक दूरी कायम गरी सांस्कृतिक परम्परालाई मात्र सञ्चालन गर्न प्रमुख महर्जनले नगरवासीसमक्ष अपिल गरे ।