काठमाडौं तपिन्तास्थित पुष्पलाल स्मृति पार्क उद्घाटन

– महर्जन रत्न
काठमाडौं / काठमाडौं महानगर पालिका वडा नं १८ तपिन्तास्थित विष्णुमती किनारमा निर्माण गरिएको पुष्पलाल स्मृति पार्कको एक समारोहका बीच उद्घाटन गरियो ।
नेपाल कम्युनिस्ट पार्टीका संस्थापक महासचिव  पुष्पलाल श्रेष्ठको ४३ औं स्मृति दिवसको अवसरमा बुधबार , प्रमुख आतिथि पुष्पलाल स्मृति प्रतिष्ठानका अध्यक्ष एवं नेकपाका वरिष्ठ नेता माधव नेपालले पार्कको मूल ढोकामा रिबन काटेर पार्कको औपचारिक उद्घाटन गरे । त्यसैगरी उनले पार्क निर्माणको शिलालेेेख पनि अनावरण गरे । साथै विशेष अतिथि काठमाडौं महानगर पालिकाका मेयर विद्या सुन्दर शाक्यद्वारा पार्कभित्र रहेको मायादेवी र सिद्धार्थको मूर्ति अनावरण गरिएको थियो । स्थानीय नेवा: सांगीतिक समूहको मंगल धुनका बीच पार्कको उद्घाटन संगीतमय बनेको थियो ।


मायादेवीको मूर्ति अनावरणपछि आगन्तुक तथा सहभागीहरुले  पार्क निरिक्षण गरे। यसपछि पार्कभित्रै एक औपचारिक कार्यक्रम  गरिएको थियो । का.म.पा. १८ वडाका वडा अध्यक्ष न्हुछेकाजी महर्जनको सभापतित्वमा भएको उक्त कार्यक्रममा प्रमुख अतिथि माधव नेपाल , विशेष अतिथिहरु मेयर विद्यासुन्दर शाक्य संघीय सांसद जीवन राम श्रेष्ठ प्रदेश सभा सदस्य बसन्त मानन्धर ,सहभागी भएका थिए । पूर्व सांसदहरू रघुजी पन्त, प्रभा बज्राचार्य , काठमाडौं महानगर पालिकाका प्रवक्ता एवं १५ वडाका वडा अध्यक्ष इश्वरमान डंगोल लगायतका ब्यक्तिहरु अतिथिका रुपमा आएका थिए ।


विष्णुमती किनारमा सुकुम्बासी हटाइ उक्त स्थानमा स्थानीय बासिन्दाले सुरु गरेको देको पार्कमा बिसं २०५१ सालमा तत्कालीन नेकपा एमाले वडा कमिटीको संयोजकत्वमा बृक्षारोपन गरेको सम्झना गर्दै बीचमा एक आयोजनाले देको पार्कको सम्पूर्ण संरचना बिगारिदिएकोमा महानगर पालिका र प्रदेश सरकारको सहयोगमा यसरी आधुनिक पार्क निर्माण सम्पन्न गरि पुष्पलाल स्मृति पार्कको रूपमा उद्घाटन गर्न पाउँदा हर्ष लागेको बताउँदै कार्यक्रमका सभापति वडा अध्यक्ष महर्जनले पार्कको निर्माणको सुरुवातदेखि योगदान गरेका व्यक्तिहरुलाई धन्यवाद ज्ञापन पनि गरे ।


कार्यक्रममा प्रमुख अतिथि नेपाल , सांसद जीवनराम श्रेष्ठले नेपाल कम्युनिस्ट पार्टीका संस्थापक पुष्पलाल श्रेष्ठको योगदान स्मरण गर्दै मन्तव्य राखेका थिए । पार्क निर्माणको निम्ति प्रदेश सभाबाट आर्थिक सहयोग दिलाउन सफल प्रदेश सभा सदस्य बसन्त मानन्धर तथा मेयर विद्यासुन्दर शाक्यले महानगरभित्र निर्माण गरिएका विभिन्न भौतिक संरचनासँगै पुष्पलाल पार्क जस्ता खुल्ला पार्क निर्माणको महत्त्व र यसको बजेट व्यवस्थापन बारे आफ्ना अनुभव सुनाएका थिए ।
काठमाडौं महानगर पालिका र बागमती प्रदेशको पर्यटन उद्योग तथा वातावरण मन्त्रालयको आर्थिक सहयोगमा बनेको यस पार्क हुन त खुलेको वर्ष दिनजस्तै भइसकेको छ । यहाँ रहेको मायादेवी र सिद्धार्थको मूर्ति विशेष अर्थपूर्ण रहेको छ । यसलेे बुद्ध जन्मभूूूमि लुम्बिनीको झल्को दिन्छ । यस पार्कमा बास्केटबल कोर्ट , डबली , पाटी पनि छ । साथै शारीरिक अभ्यास गर्नेहरूका निम्ति हिंड्नका लागि एकुप्रेसर पाथ पनि बनाइएको छ ।
सानो चिटिक्क परेको यो पार्क काठमाडौं उपत्यकाको नदी किनारमा बनेको एक नमूना पार्कका रुपमा लिन सकिन्छ ।आधुनिक रूपमा निर्माण पूर्व यस पार्कको क्षेत्र तथा वृक्ष रोपन गर्दै लामो समय सम्म स्थानीय देयको सोसाइटीले संरक्षण गर्दै आएको स्मरणीय छ ।
फोटो: नातिकाजी महर्जन ,महर्जन रत्न