जि कन्हय् जक द्यने !

(चिबाखं)
– महर्जन रत्न

न्ह्यमव:गु मखु ।
द्यने मन मदुगु !
चाया ११:३० ता ई थात ।
किको हे हास: मदु ।
शान्त !
याउँसे च्वं । मचायेक मनय् लय् वल । जि न्हिला ।
न्ह्य: ल्वमं । लासा नं ल्वमं ।
आ: भचा जायेवं कन्हय् जुइ ।
जि थौं द्यनेमखुत ।
कन्हय् जक द्यने ।
याउँक छक: च्वने । याक: हे याउँ ।
द्यन कि म्हगस वइ । म्हगसय् व वइ थ्व वइ मदु ।
मायां क्यंम्ह नं वइ , तं क्यनीम्ह नं वइ । साहुं क्यं, धेबाया नितिं ताकिता याइपिं नं वइ । इलय् कयागु ज्या सिधयेका बिइ मफुनि ज्याया ताकिता याइपिं नं वइ । व वइ थ्व वइ हे मदु ।
ख्वनाय् पुलिसं वा:प्युवंपिन्त धित्तु ध्युंव:गु नं वइ । न्हूदँया भिंतुना धका: सर्ग :थ्वयेक भुस्या: थाना वँय् जुयाच्वंपिं नं वइ ।
क्व:बुइंचा सुचुक्क बाली न:वइ !
कोरोनां ला सितुपातु वंक ख्या: वइ ! लकडाउन, प्वा: नं लकडाउन जुइगु जकं ख:लाकि !
मचायेक जिगु थासं जि पलायन जुजुं वनाच्वंगु नं वइ ! जि तनावंगु जि गनावंगु नं म्हगस वइ !
जि ग्यानाच्वन द्यनेत ।
म्हगसय् छु वइ छु वइ !
उकिं जि भचा याउँक च्वने !
जि कन्हय् जक द्यने !