उपन्यासकार नजरराम महर्जन अपरेसनया नितिं अस्पताल भर्ना

यें/ उपन्यासकार नजरराम महर्जन अपरेसनया नितिं अस्पताल भर्ना जुयादीगु दु ।
वयक: सानेपाया स्टार अस्पतालय् हर्निया व प्रोस्टेटया अपरेसन यायेया नितिं भर्ना जुयादीगु ख: । चिनी ल्वय् दुम्ह वयक:या म्हय् चिनी उप्वया च्वंगु हुनिं अपरेसन धा:सा मजूनि ।
“डाक्टरपिसं बांलाक स्वयाच्वंगु दु । चिनी कन्ट्रोलय् वलकि जक अपरेसन यायेगु जुइ धा:गु दु । आ: उखुन्हु स्वया: बांलाना व:गु दु” सुभाय् पोस्टलिसे थौं सुथय् खँल्हासें वयकलं धयादिल  “उखुन्हुला सुगर ६०० थ्यनाच्वंगु खनिं इलय् अस्पतालय् थ्यंगु अले थनया डाक्टरपिसं बांलाक वास: यानाब्युगुलिं आ: बिस्तारं नियन्त्रणय् वये धुंकुगु दु । आ: छन्हु निन्हुंं अपरेसन याइ जुइ ” वयकलं धयादिल ।
नेपाल भाषा साहित्यय् त:गुमछि उपन्यास च्वया: योगदान यानादीम्ह वयक: छम्ह राजनीति नेतृत्व तह तक च्वना: नं ज्या यानादीधुंकुम्ह व्यक्ति ख: । भाषा संस्कृति व अधिकारया संघर्षय् जीवन पाना: झायादीम्ह वयक: नजर राम महर्जन ज्यापू महागुथी लगायत थीथी संस्थाय् नं सक्रियम्ह व्यक्ति ख: । वयक: जोजलपा वा: पौ व किर्तिपुर शन्देश पत्रिकाय् सक्रिय जुया: ज्या याना वयाच्वंगु ख: ।
छुं ई न्ह्य:निसें वयक:या स्वास्थ्यय् भचा कमजोरी व:गु ख: ।
“जित: स्वयेत  काय् अफिस मवंसे अस्पतालय् हे चुंच्वंगु दु । उकिं याउँसे च्वं!”  उपन्यासकार नजरराम महर्जनंं मफुगु इलय् काय् नापं दुगुलिं लसता नं प्वंकादिल ।