मिसा बाखं च्वमिपिझिनि झिन्ह्य्पु बाखंया समीक्षा क्वचाल

शिकागो ,अमेरिका / नेपालभाषा साहित्य बाखं ख्यःया नांजाःपिं मिसा बाखं च्वमिपिं व न्हूपिं बाखंच्वमिपिं याना मुक्कं झिन्ह्यपु बाखंया समीक्षा ज्याझ्वः शनिवाः क्वचाःगु दु ।
थौं स्वयां लच्छि न्ह्यःनिसें शनिवाः पतिकं बहनी न्हिं न्यापु व खुुपु खुपु याना मुक्कं झिन्ह्यपु बाखं डा. रिना तुलाधर, लोचनतारा तुलाधर, निजिरोस श्रेष्ठ, दिब्या ताम्रकार, रिता महर्जन, सुवर्ण केशरी चित्रकार, रिता देवी प्रधान जोशी, श्रीलक्ष्मी श्रेष्ठ, रेणु श्रेष्ठ, ईश्वरी मैया श्रेष्ठ, सरस्वती तुलाधर, प्रमिला सायमि, मन देवी ताम्राकार, मोति लक्ष्मी शाक्य, अर्चना शाक्य, सुनिता महर्जन व अमिर मैया रञ्जितपिन्सं अनलाइनपाखें थःथःगु बाखं ब्वनाः न्यंकादीगु खः ।
ज्याझ्वलय् साहित्यकार नविन चित्रकार, समालोचक पूर्ण काजी ताम्राकार व प्राध्यापक प्रेमशान्ति तुलाधरपिन्सं अनलाइनपाखें वहे झिन्ह्यपु बाखंया समिक्षा यानादीगु खः ।
बाखंया समीक्षा यायेगु झ्वलय् साहित्यकार चित्रकारं बाखनय् पात्र व थाय्नं दुसा बाखं अझ स्तरीय जुइगु खं कनादीगु खः । अथेहे समालोचक ताम्राकारं बाखनय् पात्रं नवाकेगु झ्वलय् पात्रं हैसियत, उमेरकथं गुलि गथे नवाकेमा धैगुनं बिचाः यायेमा धयादिलसा प्राध्यापक तुलाधरं थौंकन्हय्या बाखंया विषयवस्तुइ मिसाच्वमिपिसंनं न्हूगु पहः हःगु नापं थौंकन्ह्यया समस्याया च्यूताः काःगु खनेदु ।
हलिं नेवाः दबू, अमेरिका कचाया ग्वसालय् जूगु थुगु ज्याझ्वःया कजि शिकागोय् च्वनादीम्ह बाखं च्वमि केशर मान ताम्राकारं न्ह्याकादीगु खः । थुकियात ग्वाहालि वासव राजोपाध्याय व हलिं नेवाः दबू अमेरिका कचाया नायः प्रमेश श्रेष्ठं यानादीगु खः ।
बुखं : नेवाः सूचना केन्द्र