याङ्कीका सैतानहरू

दीपक विश्वकर्मा
बहादुर उत्तर कोरिया
र स्वाभिमानी इरानलाई
याङ्कीले भन्ने गर्दछ सैतानको देश
किनकि
उनीहरू लडिरहेका छन्
उसको प्रभुत्वको बर्खिलाप ।
याङ्कीकोे नाकै तलको
एक बहादुर देश
जो लडिरहेको छ
आधा शताब्दीदेखि
र खसाली रहेको छ
याङ्कीका पखेटाका प्वाँखहरू
क्युवा बहादुर छ
स्वाभिमानी छ
उसले साम्राज्यवादको विरोध गर्दछ
त्यसैले ऊ सैतानहरूको देश हो ।
बोलिभिया
वर्षौदेखि लडिरहेको छ
अमेरिकी चीलको विरुद्ध
खसाली रहेको छ
त्यसका पखेटाहरू
रक्षा गरेको छ देशको अस्मिता
सोही कारणले
बहादुर बोलिभियालीहरू सैतान हुन् ।
चीन आधा सैतानी मुलुक हो
अमेरिकाको लागि
संसारका हर स्वाभिमानी जनताहरू सैतान हुन्
वीर भियतनामीहरू सैतान हुन्
किनकि
अमेरिकी बम, बारुदको प्रबाह नगरी
उसका कथित बहादुर जल्लादहरुलाई
धुलो चटाएका हुन् ।
जापान अतिप्रीय मुलुक हो
अमेरिकाको लागि
किनकि
फुसा टापुका निरिह चेलीहरुउपर
उसका जल्लाद सैनिकहरु
भोग गर्न पाइरहेका छन् आधा शताब्दीदेखि
अफगानका पबित्र स्थलहरुमा
परेड खेलिरहेका छन्
याङ्कीहरू र रित्याइरहेका छन्
विशाल तेलका कुवाहरू
अणुबमको हौवा फैलाएर
सद्धामको बेविलोनको सुन्दर बगैचा
चिलको नग्रामुनी दबिनुभन्दा पहिले
इराक सैतानीको देश थियो
किनकि त्यहाँ अटल योद्धा सद्दाम थियो
दक्षिण कोरिया अतिप्रीय देश हो
याङ्कीको लागि
किनकि उसका अनगिन्ती तोपहरु
नरसंहारको घडी पर्खेर
उसका समुन्द्रमा तैनाथ हुन पाएका छन् ।
आज,
लेन्डुपेहरू लागिरहेका छन्
मुलुक सुम्पिन याङ्कीलाई
हाम्रा यी हराभरा पाखापखेराहरूमा
परेड खेल्ने निम्ता दिइरहेका छन्
उसका जल्लादहरूलाई
समृद्धि, विकास र उन्नतीको नाममा
यसैले पनि
हर नेपालीहरू सैतान बन्नुपर्ने भयो अब
उसका नापाक इरादाहरूलाई ध्वस्त पार्न
पुनः एकपटक गल्ली, कुनाकाप्चाहरूबाट
मार्चपास शुरु गर्नु पर्ने भयो
सहयोद्धा मित्रहरू !
म आफै सैतान बन्दै छु
मलाई साथ दिनुस् ।
२०७७ असार १
बुटवल ।