लोकप्रिय सुशान्तको आत्महत्याले शोकमा डुब्यो बलिउड, सामाजिक सञ्जाल समवेदनाले भरियो

काठमाडौँ/ युवा पुस्ताका लोकप्रिय बलिउड अभिनेता सुशान्त सिंह राजपूतले आत्महत्या गरेका छन्।
आइतबार उनले मुम्बईस्थित आफ्नो फ्ल्याटमा आत्महत्या गरेका हुन्। उनको घरमा काम गर्ने कामदारले प्रहरीलाई सुशान्तले आत्महत्या गरेको जानकारी दिएका थिए। उनको आत्महत्याको कारण भने अझै खुलिसकेको छैन।
संयोग भन्नुपर्छ कि गत जुन ८ मा सुशान्तकी म्यानेजर दिशा सलियनले पनि आत्महत्या गरेकी थिइन्।
सुशान्तको आत्महत्यापछि यतिबेला बलिउड शोकमा डुबेको छ। बलिउड कलाकार तथा क्रिकेटरहरुले उनको निधनप्रति दुःख व्यक्त गरेका छन्।
बलिउड अभिनेता सञ्जय दत्तले सुशान्तको आत्महत्याको खबरले आफू स्तब्ध भएको लेखका छन्। साथै उनले सामाजिक सञ्जालमार्फत सुशान्तको परिवारप्रति समवेदना व्यक्त गरेका छन्।
यस्तै बलिउड अभिनेता अक्षय कुमारले ट्वीट गरेर आफू निशब्द भएको उल्लेख गरेका छन्।
भारतीय क्रिकेटर सचिन तेन्दुल्करले ट्वीट गर्दै प्रतिभाशाली युवा सुशान्तको आत्महत्याको खबरबाट आफू दुःखी भएको बताएका छन्।
यस्तै बलिउड अभिनेत्री मनिषा कोइरालाले पनि सुशान्तको आत्महत्याबाट आफू स्तब्ध भएको बताएकी छन्।
बलिउड अभिनेता विक्की कौशल, गायक तथा संगीतकार अदनान सामी, बलिउड अभिनेता अजय देवगन, शाहिद कपूर, रितेश देशमुख, अभिनेत्री सोनाक्षी सिन्हा लगायतका कलाकारहरुले सामाजिक सञ्जालमार्फत सुशान्तको आत्महत्याको खबरबाट स्तब्ध भएको बताएका छन्।
उनको आत्महत्यापछि विभिन्न देशमा रहेका उनका फ्यानहरुले पनि सोसल मिडियाबाट दुख प्रकट गर्दै समवेदना व्यक्त गरेका छन् । नेपालमा पनि उनका फ्यानहरुले फेसबुकका भित्ता मार्फत दुख व्यक्त गर्दै श्रद्धाञ्जली व्यक्त गरेका छन् ।