संविधान संशोधन सर्वसम्मतद्वारा पारित भएसँगै लिपुलेक लिम्पियाधुरा कालापानी समेटिएको नक्सा बैधानिक

संविधान संशोधनसँगै लिपुलेक लिम्पियाधुरा कालापानी समेटिएको नक्सा सर्वसम्मतद्वारा पारित
काठमाडौं/ नेपालको संविधान दोस्रो संशोधन २०७७ प्रतिनिधिसभा बैठकमा उपस्थित सदस्यहरुबाट ‘सर्वसम्मतले पारित गरेको छ । कुल सदस्य संख्याको दुई तिहाईभन्दा बढी संशोधनको पक्षमा उभिएका थिए ।
कानुन न्याय तथा संसदीय मामिलामन्त्री डा. शिवमाया तुम्बाहाङ्फेले आज शनिबार प्रतिनिधिसभा बैठकमा नेपालको संविधान (दोस्रो संशोधन) विधेयक २०७७ पारित गरियोस् भन्ने प्रस्ताव राखेका थिए । उक्त प्रस्ताव सर्वसम्मतिले पारित भएको हो । सोअघि विधेयकमाथि दफाबार छलफल भएको थियो ।
आज प्रतिनिधिसभामा कुल सदस्य संख्या २७५ मध्ये शनिबार २५८ जनाको उपस्थिति रहेको थियो । उपस्थित सबै सदस्यले पक्षमा मतदान गरेका थिए । विधेयकको विपक्षमा शुन्य मत परेको सभामुख अग्नीप्रसाद सापकोटाले बताए । मत विभाजन गर्दा उपस्थित सबै सदस्यले पक्षमा मतदान गरेकोभन्दै सभामुख सापकोटाले विधेयक दुई तिहाईभन्दा बढीले पारित भएको घोषणा गरेका थिए ।

बिधयकमाथि दफावार छलफलको क्रममा सांसद जीवनराम श्रेष्ठ

संशोधन प्रस्ताव पारित भएसँगै नेपाली भूभाग लिम्पियाधुरा, कालापानी, लिपुलेक, कुटी, गुञ्जी, नावीसहितको भूभाग नेपाली नक्सामा समेटिएको छ । संसदबाट विधेयक पारित भएपछि नयाँ नक्साले संवैधानिक मान्यता प्राप्त गरेको छ ।
प्रतिनिधिसभा नियमावली २०७५ को नियम १३७ को उपनियम (९) मा संविधान संशोधन गर्ने विधेयक पारित गरियोस् भन्ने प्रस्ताव सभामा तत्काल कायम रहेका सम्पूर्ण सदस्य सङ्ख्याको कम्तीमा दुई तिहाई सदस्यको बहमुतबाट स्वीकृत भएमा विधयेक पारित भएको मानिनेछ व्यवस्था छ ।

संविधान संशोधनको क्रममा मतदानको निम्ति हस्ताक्षर गर्दै सांसद शान्ता चौधरी

त्यस्तै, उपनियम (१०) मा संविधान संशोधन गर्ने विधेयक पारित गरियोस् भन्ने प्रस्तावमाथि सभाको निर्णय सदस्यको दस्तखतसहितको मत विभाजनद्वारा हुनेछ व्यवस्था छ ।
संशोधन प्रस्ताव पारित भएसँगै नेपालको लिम्पियाधुरासमेतको नक्साले बैधानिकता पाएपछि सबै दलका नेताहरुले राष्ट्रियताको सवालमा सबै दल एकै ठाउँमा उभिएको बताएका थिए ।