सुदूरपश्चिमका नाकाबाट तीन हजार ८१३ नेपाली भित्रिए, ६५३ भारतीय बाहिरिए प्रदेश

लम्की / कामका लागि भारतका विभिन्न शहर गएका नेपाली लामो लकडाउनले खाना र बासको समस्या भएपछि नेपाल फर्किएका छन् भने केही भारतीय नागरिकसमेत आफ्नो देश फिर्ता गएका छन् ।
कोरोना सङ्क्रमणको जोखिम मोल्दै सुदूरपश्चिम प्रदेशका दुई मुख्य नाका भएर मङ्गलबार तीन हजार ८१३ नेपाली नेपाल भित्रिएका छन् भने सोही नाका भएर ६५३ भारतीय बाहिरिएका छन् ।
सुदूरपश्चिम प्रहरी कार्यालय, दीपायलका प्रहरी निरीक्षक जगदीश सिंह डाँगीले मङ्गलबार साँझसम्म कञ्चनपुरको गड्डाचौकी नाकाबाट एक हजार २०७ नेपाली भित्रिनुका साथै १८५ भारतीय नागरिक आफ्नो देश फिर्ता गएको बताए।
त्यसैगरी, कैलालीको गौरीफन्टा नाकाबाट दुई हजार ६०६ नेपाली भित्रिएका छन् भने ४६८ भारतीय बाहिरिएका छन् । भारतबाट नेपाली आउने क्रम सोमबारबाट घट्दैगएको छ । सोमबार चार हजार ७०९ भित्रिएको मङ्गलबार झण्डै एक हजार कम भित्रिएका छन् ।
योसँगै सुदूरपश्चिम प्रदेशका विभिन्न नाका भएर जेठ २ गतेयता नेपाल भित्रिने नेपालीको सङ्ख्या करिब ७१ हजार पुगेको छ भने बाहिरिनेको सङ्ख्या नौ हजार बढी पुगेको छ ।
सीमा प्रवेश गरेका नेपालीलाई विभिन्न जिल्लाका स्थानीय तहले सीमामै गाडी व्यवस्था गरी उद्धार गरेका छन् ।