लकडाउन थप कडा गरिने , जेठ २० सम्म लकडाउन

काठमाडौं / सरकारले लकडाउन जेठ २० गतेसम्म लम्ब्याउने निर्णय गरेको छ । मन्त्रिपरिषद्को आज आइतबार बसेको बैठकले लकडाउन लम्ब्याउने निर्णय गरेको एक मन्त्रीले जानकारी दिएको  सुत्रले बताएको  छ ।
यसअघि कोरोना भाइरस रोकथाम तथा नियन्त्रण उच्चस्तरीय समन्वय समितिले लकडाउन लम्ब्याउँदै थप कडाइ गर्न सरकारलाई सिफारिस गरेको थियो।
आज आइतबार बसेको समिति बैठकले लकडाउन लम्ब्याउन र यसलाई थप कडाइ गर्न सरकारलाई सिफारिस गरेको हो । लकडाउनकाे कारण ठूलो दुर्घटनाबाट जोगिएको अवस्थामा थप कडाइ गर्ने विषयमा सरकारलाई सिफारिस गरिएको प्रधानमन्त्री तथा मन्त्रिपरिषद् कार्यालयका सचिव नारायणप्रसाद बिडारीले बताए ।
विभिन्न नगर तथा गाउँ पालिकाहरुमा स्थापना भएका क्वारेन्टाइनहरुलाई व्यवस्थित गर्नुपर्ने तथा यसको व्यवस्थाको निम्ति आवश्यक बजेट समेत छुट्याउने निर्णय बैठकले गरेको छ । सङ्क्रमितकाे सङ्ख्या बढिरहेको र दुई जनाको मृत्यु भइसकेको छ। लकडाउन नभएको भए अझ अवस्था भयावह हुने बैठकले निष्कर्ष निकालेको छ ।
प्रधानमन्त्री तथा मन्त्रिपरिषद्काे कार्यालयको बैठकले सुरक्षा व्यवस्थालाई प्रभावकारी गर्ने, आपूर्ति व्यवस्थालाई सहज गर्दै दैनिक उपभोग्य वस्तुको नियमित आपूर्ति गर्ने निर्णय पनि गरेको छ ।
सरकारले पछिल्लो पटक थपेको लकडाउनको अवधि भोलि सोमबार सकिँदैछ ।