कन्हय् निसें चन्द्रागिरि नगरपालिका सिल याइगु

येँ / चन्द्रागिरि नगरपालिकाय् च्वनीपिं प्यम्हेसित कोरोना भाइरसया संक्रमण खनेवं अनया स्थानीय निकाय, सुरक्षाकर्मीत व स्थानीयवासीतय्सं उगु थाय्यात सुरक्षित तयेगु निंतिं पलाः ल्ह्वनेगु सुरु याःगु दु । थ्वहे झ्वलय् नगरपालिकां कन्हय् न्हिनय् १२ बजे निसें जेठ ७ गते सुथय् ६ बजे तक सिल यायेगु निर्णय याःगु दु ।
चन्द्रागिरि नगरपालिकां नागढुंगा-थानकोटया राजमार्ग बाहेक मेगू फुक्कं सतकय् गाडी चले यायेत प्रतिबन्ध तःगु दु । उगु राजमार्गय् नं एम्बुलेन्स लगायत अत्यावश्यक गाडी जक चले याकेबीगु व अज्याःगु गाडीत अनया सतकय् गनं नं दिकेमबीगु खँ नगरपालिकां धाःगु दु ।
थौं च्वंगु नगरपालिकाया प्रतिनिधि व सुरक्षा अधिकारीतय् मुँज्यां चन्द्रागिरि नगरपालिकायात सिल यायेगु निर्णय याःगु खः । सिलबन्दीया अवस्थाय् वासः पसः बाहेक मेगू छुं नं कथंया पसः चायेके मदइगु जूगु दु । नगरपालिकाया प्रवक्ता हरिभक्त महर्जनं सुनं मनूतय्सं निर्णयया उल्लंघन याःसा कारवाही जुइगु खँ धयादिल ।
‘पूर्ण रुपं सिल यायेगु झ्वलय् सुंनं मनूत पिने वःसा अज्याःपिंत कारवाही जुइ,’ प्रवक्ता महर्जनं धयादिल, ‘अज्याःपिंत प्रहरी निघौ होल्डय् तयाः लिपां निसें अज्याःगु नियम उल्लंघन मयायेगु प्रतिबद्धता प्वंकाः जक त्वतेगु जुइ ।’
नगरपालिका दुने पूर्णरुपं सिल यायेत व नगरयात सुरक्षित तयेगु निंतिं अनया झिंन्यागूलिं वडाया अध्यक्षतय् ब्रिफिङ यायेगु ज्या नं जूगु खँ प्रवक्ता महर्जनं कनादिल ।
वैशाख ३० गते नगरपालिकाय् च्वनीम्ह ३३दँया मिसायात संक्रमण खनेदुगु खः । अथेहे जेठ १ गते ३२दँया मिजं व ७दँया मिजं मचायात नं संक्रमण जूगु खः । अथेहे धादिङय् संक्रमित जुम्ह ३०दँया मिसा नं येँया सतुंगलय् च्वनीम्ह खः ।
नेपाल भाषा टाइम्सपाखें