लकडाउन उलंघन गरि बाहिरबाट उपत्यका नपस्न स्थानीय जनप्रतिनिधिहरुको चेतावगरी, लकडाउन पालना गर्न स्थानीयलाई आग्रह

बिगेन तुलाधर / सौगात मिश्र,
काठमाडौँ – कोरोना भाइरसका कारण सरकारले निर्णय गरेको लकडाउन उल्लंघन गर्दै मानिस आवतजावत गर्ने क्रम रोकिएको छैन ।अरु स्थानभन्दा केहि कम संक्रमण देखिएको काठमाडौँ उपत्यकामा बाहिरबाट पद तथा शक्तिको दुरुपयोग गर्दै मानिस उपत्यका भित्रिने क्रम बढ्दो छ । यस क्रमलाई हेर्दा बाक्लो बस्ती रहेको काठमाडौँ उपत्यका कोरोना संक्रमणको निकै जोखिममा रहेको छ । काठमाडौँ महानगरपालीका वडा २२ मा पाँच जना मानिस लकडाउनको उल्लंघन गर्दै भित्रिएकोमा प्रशासनसँगको सहकार्यमा उनीहरुलाई फिर्ता पठाइएको वडाध्यक्ष चिनिकाजी महर्जनले जानकारी दिए । अझै पनि लकडाउन उल्लंघन गर्दै अनाधिकृतरुपमा प्रवेश गरे त्यसले दुर्घटना निम्त्याउने चेतावनी समेत दिए ।राहत वितरण र निशुल्क खानाको व्यवस्थाले पनि काठमाडौँमा मानिस भित्रिने चाप बढेको काठमाडौँ महानगर वडा २७ का वडाध्यक्षको बुझाइ छ । लकडाउनको उल्लंघन गरी अनाधिकृतरुपमा आफ्नो वडा प्रवेश गरे स्थानीयको सहयोगमा वडाबाट लखेट्ने चेतावनी पनि उनले दिए ।पहुच र शक्तिका आधारमा आफ्नो वडामा प्रवेश गर्ने कल्पनासमेत नगर्न कामपा १२ का वडाध्यक्ष विकास डंगोलले चुनौती दिए । कोहि व्यक्ति अनाधिकृतरुपमा वडा प्रवेश गरे आफूलाई जानकारी गराउन पनि उनले आग्रह गरे । त्यसरी आएका व्यक्तिलाई स्थानीय र प्रशासनको समन्वयमा फिर्ता पठाउने पनि उनले जानकारी दिए ।वडाको तर्फबाट आफूले घरवालाहरुलाई आफ्नोमा बस्ने डेरावालहरुलाई हाल नआउन जानकारी गराइदिनु भन्ने सन्देश विभिन्न तवरबाट दिइसकेको कामपा १८ का वडाध्यक्ष न्हुच्छे काजी महर्जनले बताए । कोहि आएको खण्डमा निरोगीताको प्रमाणपत्र देखाउनु पर्ने अन्यथा फिर्ता पठाइने पनि उनले जानकारी दिए ।वडाको तर्फबाट घरवालाहरुलाई सचेत गराइएको र कोही कोठावाला बिना सूचना आएमा वडामा सम्पर्क गर्न अनुरोध गरेको कमपा १९ का वडाध्यक्ष शशीलाल श्रेष्ठले बताए । टेकु अस्पतालबाट स्वास्थ जाँच नगरी वडा प्रवेश गर्न नपाइने पनि उनले जानकारी दिए ।को-कसको सम्पर्कमा छन् भन्ने कुरा थाह नहुने भएकोले बाहिरबाट उपत्यका प्रवेश गरिनु खतरा हुने कामपा २० का वडाध्यक्ष राजेन्द्र मानन्धरले बताए । आफ्ना वडामा विभिन्न जनचेतनामुलक सूचनाहरु टासेर सचेत गराइरहेको र काठमाडौँलाई पनि शिल गरिए शुरक्षित हुने पनि उनको सुझाव रहेको छ ।नेपालमा पछिल्लो समय कोरोना संक्रमणको संख्या २१९ पुगेको छ । अधिकांस कोरोना संक्रमितको अवस्था हेर्दा उनीहरुको एक ठाउंँदेखि अर्को ठाउंँँ यात्रा गर्नेहरुमा संक्रमण भएको देखिएको छ । अत्यावश्यक काम बहेक घर बाहिर ननिस्किएर र यात्रालाई पूर्णरुपमा बन्देज गरेर कोरोनाको संक्रमणबाट बच्न सकिन्छ ।