पण्डित बद्रिरत्न बज्राचार्यया बारे छत्वाचा चिन्तन

सुगत रत्न सिन्दुराकार
भगवान बुद्धं थःगु जीवनय् संघर्ष याना बोधिज्ञान लाभ याना लोकयात इना बिज्याना लोकया हित याना विज्यागु दु । थुकथं हे वसपोलया योगदानं याना वसपोलयात झीसं गुरुकथं थौं तकं नं श्रद्धा तयाः हनावना याना नाला वयाच्वना । नेपाःया बुद्ध धर्मया ख्यलय् आपालं गुरुपिं जुया विज्यागु दु । गुम्ह मनुखं लोकयात हित यायगु लँपु क्यना बिज्यागु दु । कल्याण यायत शिक्षा दीक्षा बिया बिज्यागु दु । वसपोलपिन्त गुरुकथं नालेगु याना वयाच्वंगु दु । उकिं बुद्ध जयन्तीया आसपासय् भगवान बुद्धयात गुरु लाना लुमंका श्रद्धा तयमाःगु ला जू हे जुल । थुकिया नाप नापं लोकयात भिंगु लँपुइ न्ह्योज्याकुपिं सुखावति भूवनय् वास लाय् धुंकूपिं गुरुपिन्त नं हनावना तयाः बुद्ध धर्मया दर्शनया खँया विषयवस्तुयात कःघाना चर्चा परिचर्चा यायगु ज्या याना वनेमाःगु खनेदु । थुकथं यानावन धाःसा आपालं गुरुपिन्त लुमंकेगु होता चूलानाच्वनी । नापं थुकथं यानावने ताःतात धाःसा थ्व नं छगू तःधंगु आस्था तःगु सावित जूवनि । उकिं नेपालय् आपालं बज्राचार्यपिन्सं थःथःगु इलय् लोकयात भिंगु दिशाय् न्ह्योज्याकेत थःत समर्पित याना वंगु दु । उकिइ मध्ये पण्डित बद्रिरत्न बज्राचार्य नं छम्ह ज्वःमदुम्ह खः ।
वसपोलया विषयलय् नं बांलाक चिन्तन हनावना तयाः वनेगु ज्या जुयावन धाःसा झीत आपालं मार्गदर्शन दयाच्वनी । नाप नापं प्रेरणा कायगु आधारत नं चुलानाच्वनी । झीसं बुद्ध जयन्तीया अवसरय् बुद्ध धर्म विकासया ज्याय् आपालं थःत पाना वंपिन्त लुमंकेगु व वसपोलपिनिगु योगदानया चर्चा याना वनेगु ज्या न्ह्याकावन धाःसा गुरुयात सम्मान यानागु सावित जूवनी । पण्डित बद्रिरत्न बज्राचार्यजुं थःगु जीवनकालय् आपालं ज्या याना बिज्यागुलिं थौं झीगु न्ह्योने वसपोल मदीसां तवि नं वसपोलया कृति, योगदान आपालं झीगु न्ह्योने दु । खास याना लोकय् मनूया भौतिक शरिर मदुसां तवि नं वयकपिनिगु योगदान वा कृति झीगु न्ह्योने दयाच्वन धाःसा वयकःपिं न्ह्यावलें म्वानाच्वंगु सावित जुयाच्वनी ।
गुरुवर बद्रिरत्न बज्राचार्य छम्ह नांजाम्ह गुरु जक मखु । वसपोल छम्ह प्रतिस्थित पण्डित नं खः । नाप नापं बजूयान बुद्ध धर्मयात च्वन्ह्याकेगु ज्याय् थःगु जीवन हे समर्पित याना विज्याम्ह बौद्ध व्यत्तित्व नं खः । गुरुजु बुदिरत्न बज्राचार्यया विषयलय् खँल्हाय् बलय् वसपोलं बुद्ध धर्म प्रचारया नितिं नं थःत समर्पित याना विज्यागु दु । अथे हे वसपोलया व्यत्तित्वया खँ ल्हाना वनेबलय् वसपोल छम्ह कुशल बाखंकःमि, नेवाः संस्कृतिया आधिकारिक ज्ञाता, धार्मिक ज्याखँया विशेषज्ञ, कर्मकाण्ड पुनरुत्थानकर्ता व बौद्ध धर्मया विद्धानकथं नं समाजय् प्रतिस्थापित जुया विज्यागु दु । वसपोलं बौद्ध कर्मकाण्डया ब्वनेकु्थि चायका गुरुजुपिन्त थःके दुगु ज्ञानयात थःलिसे जक सिमित मयासे आपालं इना विइगु ज्या तकं याना बिज्यागु दुसा थुगु थुकथंया अतुलनीय ज्याया दृष्टिकोणं वसपोलं उदार महान तकं जुया बिज्यायत ताःलाका विज्यागु दु ।
पण्डित बद्रिरत्न बज्राचार्यजुं नेपाःया हे म्हसीकाया रुपय् धस्वानाच्वंगु परम्परागत संस्कार लोप जुइत्यंगुयात पुनजागृत यानागु ज्या तकं याना बिज्यागु दु । वसपोलं बज्राचार्य अध्ययन मण्डल थें जाःगु संस्था नीस्वना बज्राचार्यपिन्त चचा म्ये, मुद्रा, ज्यायगु, नेपाल लिपि स्यनेगु, बाखं कनेगु तरीका, संस्कृत भाषाया ज्ञान लगायतया ज्या न्ह्याका गुरुजुपिन्त कर्मकाण्ड ख्यलय् निपूर्ण याना विज्यागु खः । वसपोलं वैरोचन तीर्थ निर्माण समिति स्वना उगु थासय् विहार दयका बिज्यागु दुसा थाय् थासय् आपालं मूर्ति स्थापना, चैत्य आदि स्यंगुयात ल्होना न्हूधाः यायगु ज्या तकं याना विज्यागु दु ।
उकिं झीसं पं. बद्रिरत्न बज्राचार्यजुयात लुमंका च्वनेगु ज्या याना वनेमाःगु दु । वसपोलया व्यत्तित्वया खँ ल्हाय् बलयु वसपोलं थःगु जीवनकालय् आपालं थाय् थासय् थीथी बाखं कना बिज्यागु दु । वसपोलया बाखं कनेगु शैली नं तसकं हे च्वन्ह्यागु सकस्यां तायकाच्वंगु दु । वसपोलं थःगु जीवनकालय् कना बिज्यागु छुं छुं बाखंया शीर्षक थन सफूतिइ न्ह्योथनातःगु धलःया आधारय् बाखंया शीर्षक न्ह्योव्वया च्वना । क्वय् न्ह्योथनागु शीर्षकया बाखं वसपोल भाजु बज्राचार्यजुं २०२३ सालया गुंलां मखंबहालय् धर्मदेशना याना बिज्यागु खः । पुण्यवल, हस्तकुमार, महिसास कुमार, नन्दिमुख, महानन्द, सोत्थीसेन सम्वुला, नाला करुणामय, राजतीर्थ, सुचन्द्र गुहपति, धर्मश्रीमित्र, चन्द्रप्रभा, सेना, शिवि, मत्तकभत्त,काषाय, यज्ञ,सर्वज्ञावदान, चृुल्ल धर्मपाल, शुद्धाभोजन, स्वयम्भू पुराण, पद कुशल, महानन्द, मघमानवक, जेतवन, कुतीलज दोल, महासत्व, पदमावती, विमलदत्त,इल्लीस, सत्यशिला, विमलकेतु, धनकर कर्माकर, रत्नध्वज, निधन, जयदिल, विशाख, मणिचूड, सिवली, हस्तिपाल, सिंहसार्थ
वसपोलं नेपालभाषां बज्रयान बुद्ध धर्म दर्शनयात कःघानातःगु बाखंं कना बिज्यागुलिं वसपोल नेपालभाषा सेवक तकं जुया बिज्यागु दु । वसपोलया थुकथंया कुतलं नेपालभाषाप्रति थीथी थाय्या नेवाःतयत उत्प्रेरित यानाः थःगु मांभायु प्रति ममता थनाः विइगु ज्या तकं याना विज्यागु खनेदु । वसपोलया थुकथंया नेवाःभाषं थीथी थासय् बाखं कना विज्यागुलिं छखे महायान, बज्रयान बौद्ध धर्मया प्रचार जूगु खनेदुसा मेखे झीसं झी नेवाः जुयागु नातां नेपालभाषायात जीवन्तता बिया थःगु जीवन न्ह्याका च्वनेमाः धकाः भावना पिज्याकेगु ज्या याना बिज्यागु दु ।
प्रकाशन तिथि :२०७७ बैशाख २६ गते शुक्रवाः