भूषण लाल श्रेष्ठ
जि झीदँ झिंनिदँ दुबलेनिसें ज्या यायेत जिमिथाय् छेंय् वयाच्वंम्ह छम्ह खँ ल्हाय् मसम्ह मनू छम्ह दूगु जुयाच्वन । वयात फुकस्यां पाकः धाइगु । वया मांबा मदयेधुंकल । दाजु व तताजुं वयात लहिना ब्वलंका त:गु जुल । व तधिक जुया वःलिसे वयात छुंकथंया ज्या-रोजगारी बीगु दु ला धका जिमि ककायागु ज्यासलय् ब्वनाह:गु ख: ।
व ज्या यायेत न्हिन्हि मेपिं ज्यामित नाप वइगु । वयात न्ह्याम्हेस्यां ज्या वा:सां म्हा मधासें न्हिला न्हिला ज्या याइगु । छम्हेसिया ज्या यायेगु झ्वलय् मेमेस्यां ज्या वात धाःसा न्हापाम्हेसिगु ज्या लोमंका लिपाम्हेसिया ज्या याःवनिगु ।
ज्यासलय् ज्या याना ववं सोजाम्ह धका वइत छेंयागु माःगु ज्या न यायेत धका छेंय् हे तयाथकल । पलेसाय् सितिकं नयेगु, त्वनेगु व च्वनेगु क्वथा छकू न बिल । आबलिं ज्यासलय् ज्या याना वइगु धेबा छगः न खर्च मजुल ।
वं तकोमछि खँ ल्हायेत कुतः याइ तर खँल्हाये मफु । ल्हातं क्यना जक खँ पां-थू । पाक: धालकि खूब तंचाइ । वैगु भासं निपा ल्हातं क्यना धाइ – ‘छ हे पाक: का !’
न्हिथं पसलय् वना भोंतय् च्वयाब्यू धलःकथंया तरकारी, हलज्वलं न्याना हइगु । गबलें १ घौ, २ घौ तक न लिहाँ मवया स्ववन धाःसा पसःया साहुयात ग्वहालि यानाच्वनिगु । साहुयात न्यंसा ‘वं छु काःवगु भ्वं हे मब्यू’ अखतं लिसः बिइगु । उकिं त्वालय् दक्कोस्यां व पाकःयात पचिं क्यना धाइगु -‘कराइ क्वय्का चिकं न्यायेके छोयमाम्ह का !’
बहनी छेंय् जा नयेधुंका चिप:गु थलबल सिलेगु व सुचुकुचु यायेगु भाला पाक:चिया । सकलें द्यनेधुंका वयागु पाक:राज न्ह्याइगु । चच्छिया दुने छथायच्वंगु मतया लाइन मेथाय् तया च्याकिगु सा गबलें बेलि नया अन हे न्ह्यलं बाना च्वनि । अले चान्हसिया १,२ बजे चिप सिलेगु याइ । गबलें चिप सिलाच्वंथाय् न्ह्यलं बानाच्वनि । अले ग्वंग: हालकि तिनि ल्यं दूगु चिप सिलि । थल सिलिबले वइगु ताङतुङ सबतं याना त्वालय् च्वंपिनि गजब चाया धाइ -‘गुलि जक लिबाक्क बेलि न:गु ।’ गुलिसिन ‘खुँ वल ला छु’ धका मतिइ तैगु ।
खँ ल्हाय् मफुसां बुद्धि दुम्ह पाक:चां किपा कीगु, बिजलि तार मिले यायेगु व मेमेगु ताकतुक ज्या यायेस: । छेंय् फुकस्यां वयात हे ज्या याकिगु । लिपा जुया वंलिसे व जिमिगु छेंयया दुज:थें जुल । वयात छेंय् मखकि पाक: गन वन धका फुकस्यां मालेत वनि । पाक: धा:सा पसलय् अखबार स्वया मेपिन्त थ:गु नां क्यना च्वनि । वया नां च्वयेगु, मेपिन्त क्यनेगु खूब य: । थुकिया लिच्व:कथं व च्वनिगु क्वथाया अंग:, धलिं व खापाय् थ:गु नामं छायपिकात:गु जुयाच्वन ।
मचाबले बाँलाक हे नवाये फुम्ह, खँ ल्हाये सःम्ह वइत तायफाइद ल्वचं कया नःवाये मफुत । अयनं मचाबले भचासां आखः सयेकातःगुलिं आखः च्वयेसः, ब्वने न सः । तर छु धा:गु धैगु न्ह्यपुइ दुहाँवंगु मखु । गोरखापत्र अखबार स्वया थःगु नां गन धका मालाच्वनि । नां लुइकेवं सकसित क्यनाजुइ । थौं राष्ट्रिय एकता दिवस जूगुलिं वया लिमला । अखबारया फुक्कं धैथें पानाय् वया हे जक नां । दक्कोसित थःगु नां गन गन दु धका लयतातां क्यना च्वन । छायधाःसा वया नां ख:, नारायण ।
३ मे , २०२०
कोलोरादो, अमेरिका ।
सुभाय् मिडिया प्रा.लि.
ताम्सिपाखा , देयको , पुष्पलाल पथ काठमाडौं -१८
ईमेल: [email protected]
कार्यालय फोन- ०१-२१५६४४
स्थायी लेखा नम्बर- ६१२२८०१००
सूचना विभाग दर्ता नम्बर: ४५८/०७४-७५