आज मध्यरातिबाट कर्णाली प्रवेश गर्ने सबै नाका बन्द गरिने

सिमकोट/ कर्णाली प्रदेश प्रवेश गर्ने सबै नाका आज सोमबार राती १२ बजेबाट लागू हुने गरी एक हप्ताका लागि बन्द गर्ने निर्णय भएको जनाइएको छ।
बाँकेको नेपालगंजमा एकै दिन १५ जनामा कोरोना संक्रमण भेटिएपछि प्रदेश प्रकोप व्यवस्थापन केन्द्रको बैठकले कर्णाली प्रदेश प्रवेशका सबै नाका बन्द गर्ने निर्णय गरेको बताइएको छ ।
सबै नाकाबाट पैदलयात्री तथा सवारीसाधनलाई पूर्ण रुपमा बन्द गरि लकडाउनलाई कडाई गर्ने केन्द्रले निर्णय गरेको छ। भारत लगायत तेस्रो मुलुकबाट प्रदेश प्रवेश गरेका सबै नागरिकको सम्पूर्ण अवस्था र विवरण सम्बन्धित पालिकाले अद्यावधिक राख्ने र त्यस्ता व्यक्तिहरुको पिसिआर परिक्षणको व्यवस्था गर्ने सामाजिक विकास मन्त्रालयले निर्णय गरेको छ।
प्रदेश सरकार , सरोकारवाला पक्षसहित बसेको बैठकले सम्भावित भारतबाट प्रवेश गरेका नागरिकलाई अनिवार्य रुपमा क्वारेन्टाईनमा राख्ने समेत निर्णय भएको छ।बैठक मुख्यमन्त्री महेन्द्र बहादुर शाही तथा प्रदेश मन्त्रीहरु र सरोकारवालाहरुको उपस्थितिमा भएको थियो ।

कर्णाली प्रदेशले गरेको यस निर्णयबाट काठमाडौंले पनि केही सिकेर आफ्नो प्रवेश मार्गमा कडाइ गरेर बाहिरका मानिस उपत्यका पस्न नदिने पो हो कि ।  किन कि दिनहुँ दुई हजारभन्दा बढी मानिसहरु प्रवेश गरिएको समाचारका कारण काठमाडौंबासी तनावमा छन्।