उपत्यका बाहिरका एकजनालाई पनि लकडाउनको बेला काठमाडौं आउनु भनी अनुमति दिएका छैनौं – मेयर शाक्य

काठमाडौँ / लकडाउनको उलंघन गर्दै काठमाडौंमा सयौं यात्रुबाहक बसहरु प्रवेश गरेपछि उपत्यकामा तनावको बाताबरण बनेको बेला उपत्यका नगरपालिका फोरमका अध्यक्ष समेत रहनु भएका काठमाडौँ महानगरपालिकाका मेयर बिद्यासुन्दर शाक्यले काठमाडौँबासी एकजनालाई पनि बाहिर जानु भनेर अनुमति नदिएको तथा उपत्यका बाहिरका नागरिकलाई पनि लकडाउन अवधिभरी काठमाडौं आउनु भनेर एकजनालाई पनि अनुमति नदिएको बताए।
“केही दिन अघि मात्रै सम्पन्न उपत्यका नगरपालिका फोरमको बैठकले पनि संयुक्त विज्ञप्ति नै निकालेर उपत्यका छाडी सयौँ किलोमिटर पैदलयात्रा गरी आफ्नो घर जाने र बाटोमा दुःखकष्ट भोगिरहेका समाचार निरन्तर आएपछि गम्भीर ध्यानाकर्षण भएको बताएको थियो ।
‘पछिल्लो समय दर्जनौँ गाडीमा धमाधम गाउँ फर्काउन थालेको र बाहिरबाट पनि धमाधम काठमाडौँभित्र नागरिक पठाएका समाचार सञ्चारमाध्ययमबाट निरन्तर आउन थालेका छन्। विश्वमै महामारीका रुपमा फैलिएको कोरोनाको संक्रमणलाई रोकथाम र नियन्त्रणका लागि हामी सबै नेपाली एकजुट हुनुपर्छ । यसका लागि पनि लकडाउनको सबैले पूर्ण पालना गर्नुको अर्को विकल्प छैन ।’ मेयर शाक्यले भने । उनले उपत्यकावासी सबैलाई लकडाउनको पूर्ण पालना गर्न पनि अपील गरे ।
लकडाउनका कारण सिर्जना भएको जटिल परिस्थितिमा स्थानीय सरकारहरुले आआफ्नो क्षमताले भ्याएसम्म परिचालित भई राहत वितरण , स्वास्थ्य परिक्षण , क्वारेन्टाइनमा राख्ने लगायत अन्य प्रयास गरिरहेको भन्दै मेयर शाक्यले उपत्यकामा रहेका असहाय, अतिविपन्न र बेरोजगारले खानाको अभावमा भोकै बस्नु नपरोस् भनेर राहत वितरणलाई निरन्तरता दिइरहेको पनि बताए ।
मेयर शाक्यले सबै जिल्लाले र स्थानीय तहले उपत्यकामा अन्तका नागरिकलाई धमाधम पठाउने होडबाजी गर्ने हो भने लकडाउनको पालना नहुने र त्यसले थप समस्या सिर्जना हुने भन्दै चिन्ता पनि व्यक्त गरे ।
“लकडाउन जारी रहेको बेला एक प्रदेशबाट अर्को प्रदेश, एक जिल्लाबाट अर्को जिल्ला र एक स्थानीय तहबाट अर्को स्थानीय तहमा निर्वाध रुपमा आवत–जावत गर्दा संक्रमणको खतरा बढी हुन्छ,’ मेयर शाक्यले भने ।
“अहिले लकडाउनको समय हो यतिबेला कसैलाई पनि एक स्थानबाट अन्त जाने छुट छैन । यसमा महानगर दृढ़ छ ” उनले बताए ।