काठमाडौं महानगरद्वारा आज ४६४ जनाको आर्डी टेस्ट, सबैको रिपोर्ट नेगेटिभ

काठमाडौं / विदेशबाट फर्केर आई काठमाडौं महानगर पालिकाभित्र बसोबास गर्दै आएकाहरुको कोरोना टेष्ट गर्ने गरि काठमाडौं महानगरपालिकाले र्‍यापिड डाइग्नोस्टिक टेस्ट (आरडिटि) शुरु गरेको छ । यसक्रममा  शनिबार बसन्तपुरमा महानगर पालिका अन्तर्गतका आठ वटा वडामा बस्दै आएकाहरुको टेष्ट गरिएको छ ।  महानगरका १८, १९, २०, २१, २२, २३, २४ र २७ का ४६४ जनाको टेस्ट गरिएकोमा सबैको रिपोर्ट नेगेटिभ आएको छ ।
महानगरका १८ वडाका वडा अध्यक्ष न्हुछेकाजी महर्जनले चैत १ गतेदेखि बिदेशबाट फर्केका ब्यक्तिहरु, लकडाउन अवधिमा राहत बितरण गर्दा विभिन्न व्यक्तिहरुको सम्पर्कमा रहेका स्थानीय जनप्रतिनिधि, सुरक्षा कायम गर्न क्रियाशिल महानगरीय प्रहरी, नगर प्रहरी सहित ८१ जनासहित आरडी टेस्ट गरेका सबैको रिपोर्ट नेगेटिभ आएकोमा खुशी ब्यक्त गरे ।
काठमाडौं महानगर पालिका शहरी जनस्वास्थ्य विभाग प्रमुख नरेन्द्र विलास बज्राचार्यका अनुसार वडाका अध्यक्ष तथा सदस्यहरुको समन्वयमा टेस्ट कार्य भएको बताए । वडास्तरमा आआफ्नो रेकर्ड राखेको र त्यहि रेकर्ड अनुसार परिक्षण भइरहेको उनले बताए । यसभन्दा अगाडि कामपाका ४,५, ९, १०, १५, ३१ र ३२ नं वडामा टेष्ट भइसकेका छन् ।
“बिदेशबाट फर्केर आई काठमाडौं महानगर पालिकामा बसोबास गर्दै आएका र उनीहरूको सम्पर्कमा आएका व्यक्तिहरुलाई पहिलो प्राथमिकता दिई परिक्षण सुरु गरेका छौं।” महानगर पालिकाका मेयर विद्या सुन्दर शाक्यले सुभाय् पोस्टसँग कुरा गर्दै बताए ।
केही दिन अगाडि सन सिटि अपार्टमेन्टमा बसिरहेका ३ जनामा कोरोना पोजिटिभ देखिएको र उनीहरू यसभन्दा अगाडि कामपा वडा नं ५ कार्यलयमा कामको सिलसिलामा जनप्रतिनिधि तथा कर्मचारीहरुसँगको सम्पर्कमा आएर चियानास्ता समेत सँगै गरेको तथा राहत वितरणमा गर्दा संसर्गमा आएको आदि कारणले कतै संंक्रमण त भएको छैन भनी टेस्ट गर्नुुपर्ने कुरा आएपछि यसरी परिक्षण सुरु गरेको भन्दै मेयर शाक्यले यसप्रकारको टेस्ट ३२ वडामा नैं निरन्तरता दिने र शंकाको घेरामा रहेका सबैको परिक्षण गर्ने बताए ।आवश्यक देखिए थप जाँचको लागि टेकु अस्पताल पठाइने जानकारी पनि उनले दिए ।”जो सशंकित छन् उसले पनि आफूमा संक्रमण रहेको नरहेको बारे निवारण गर्न पाओस् र अरु सशंकित भइरहेकाको बीचमा पनि संक्रमित नभएको भनी पुष्टि गर्ने यो परिक्षणको एक उद्देश्य पनि हो” उनले बताए । महानगरबासीलाई कोरोना संक्रमणबाट टाढा राख्नु महानगर पालिकाको दायित्व भएको भन्दै उनले महानगरमा बस्ने कसैलाई भोकै नराख्ने बाचासहित आवश्यक ठहर भएकाहरुलाई राहत वितरण भइरहेको पनि जानकारी दिए । कतै कोहि टेस्ट गर्न छुटिरहेेेेको भए उनीहरूको बारे आफ्नो नजिकैको  वडा कार्यलयबाट जानकारी गराइदिन पनि मेयर शाक्यले अनुरोध गरे ।
यसरी परिक्षणमा जोड दिनु कोरोना संक्रमण न्यूनीकरण तथा नियन्त्रणमा लिनको निम्ति उल्लेखनीय कार्यको रूपमा लिन सकिन्छ ।
******
महानगरले सुरु गरेको आर डी टी बारे मेयर विद्या सुन्दर शाक्यको धारणा यस्तो रहेको छ , भिडियो हेर्नुहोस् –