वडा अध्यक्षको नेतृत्वमा कामपा १८ वडामा टोल टोलमा लकडाउन प्रभावकारी बनाउने अभियान

काठमाडौं /लकडाउनको बेला सबैलाई घरभित्र रहन अनुरोध गर्दै काठमाडौं महानगर पालिका वडा नं १८ क्षेत्रमा वडा अध्यक्षकै नेतृत्वमा बिहानै माइकिङ गर्दै स्वयंसेवकहरु टोल टोलमा घुमी सचेतना अभियान चलाउन थालेका छन् ।
विश्वलाई आक्रान्त पारेको कोरोना महामारी नेपालमा पनि संक्रमित संख्या दिनदिनै बढ्दै गइरहेको बेला लकडाउनलाई वेवास्ता गर्दै मानिसहरू बाहिर निस्कन थालेपछि सुरक्षा निकाय र स्थानीय सरकारले संयुक्त रुपमा कडाइ गरि यसलाई अझ प्रभावकारी बनाउन स्वयंसेवक टोलि बनाई वडा नं १८ मा पनि बिना कारण घर बाहिर हिंडडुल गर्न नदिने रणनीति सहित टोल टोलका युवाहरूलाई सक्रिय बनाइएको हो ।
यसैबीच टोल टोलमा कोरोना सचेतना बारे जानकारी दिंदै वडा अध्यक्ष न्हुछेकाजी महर्जनको नेतृत्वमा माइकिङ गर्ने कार्य पनि जारी राखिएको छ ।
काठमाडौं महानगरको प्राचीन थलोको रुपमा रहेको यस वडामा नरदेवी , किलागल ,तेंगल,तपिन्ता लगायत ऐतिहासिक महत्त्व रहेका सम्पदा क्षेत्रहरु समेत रहेको यस वडामा स्थानीय बासिन्दाका साथै काठमाडौं बाहिरबाट आई विभिन्न पेशा गर्दै आएका डेरामा बस्नेहरुको संख्या पनि धेरै रहेकोे छ । यस वडाले आवश्यक व्यक्तिहरुलाई राहतपनि वितरण गर्दै आएको छ ।
“अहिले कोरोना संक्रमित हुनबाट बच्ने मूल उपाय भनेको घरभित्र बस्नु हो । त्यसैले अत्यावश्यक नभैकन घर बाहिर ननिस्कन सबै वडाबासीलाई मेरो हार्दिक अनुरोध छ “वडा अध्यक्ष न्हुछेकाजी भन्छन् “तर यसलाई बेवास्ता गरे कार्बाही समेत गर्न सकिने पनि उनले बताए ।
कोरोना संक्रमण न्यूनीकरण र नियन्त्रण गर्न लकडाउन प्रभावकारी बनाउन कडाई गर्नुपर्ने अहिले बाध्यात्मक परिस्थिति नैं रहेको छ ।