सक्वया बज्रयोगिनी जात्रा नं दित !

येँ/सक्वय् दँय्दसं जुइगु बज्रयोगिनी उग्रताराया द्यः जात्रा नं दिउगु दु । सरकारं कोरोना भाइरसया संक्रमणया खतरा कारणं लकडाउन यानातःगु व कोरोनाया संक्रमणया खतरा नं दुगुलिं द्यः जात्रा दिकूगु खः ।
शंकरापुर नगरपालिकाय् च्वंगु सर्वपक्षीय बैठक लिपा द्यःजात्रा दिकेगु क्वःछिउगु खँ जात्रा व्यवस्थापन समितिया संयोजक मीजेन्द्रकाजी श्रेष्ठं धयादीगु दु ।
बज्रयोगिनीया जात्रा दँय्दसं चैत्र शुक्ल पुन्हि निसें च्यान्हु तक न्ह्याइगु खः । थ्व जात्रा कलिगत संवत् १८१८ य् जुजु शंखदेवया पालं निसें न्ह्याना वयाच्वंगु विश्वास यानातःगु दु । थ्व जात्राया इलय् वज्रयोगिनी उग्रतारा द्यःया लिसें चैत्य, सिंहीनी, ब्याघ्रिनी द्यःयात खटय् तयाः सक्व देय् चाःहिकेगु याइ ।
स्वद्वः व स्वसः दँ ताःहाकःगु इतिहास दुगु थ्व जात्रा आःतक स्वक्वः जक स्थगित जूगु खँ धाःगु दु । थ्वयां न्ह्यः छक्व जुजु रणबहादुर शाहया पालय् तःकैया ल्वयया महामारी जुयाच्वंगु इलय् व वि.सं. १९७० इ वज्रयोगिनी देगलय् मिं नःगु इलय् जात्रा दिकूगु इतिहास दु ।
थुगुसी नं द्यः जात्रा मयासे जात्राबलय् यायेमाःगु पुजा जक जुइगु खँ धाःगु दु ।
साभार : नेभाटा