युवराज चार्ल्स पनि कोरोना पीडित , वैभवशाली दरबारमा पनि कोरोना पस्यो!

लण्डन /बेलायतको राजदरबार बकिङघम प्यालेस पनि छोडेन कोरोना भाइरसले । युवराज चार्ल्समा पनि कोरोना पोजिटि भएको पाइयो ।
समाचार एजेन्सी एएफपिले बकिङघम प्यालेसको स्रोतलाई उद्धृत गर्दै यो समाचार प्रकाशनमा ल्याएको छ ।

राजकुमार चार्ल्सलाई कोरोनाभाइरस सङ्क्रमण भएको उनको औपचारिक निवास क्ल्यारन्स हाउसले पुष्टि गरेको छ।
एकहत्तर वर्षीय राजकुमार चार्ल्सलाई मध्यम खालका लक्षणहरू देखिएको तर उनको स्वास्थ्यावस्था राम्रो भएको एक प्रवक्ताले बताएका छन्।
उनकी ७२ वर्षीया पत्नी डचिस कोर्न्वलको पनि परीक्षण गरिएको छ। तर उनमा भाइरस भएको देखिएन।
चार्ल्स र कमिल दुवै जना अहिले स्कटल्यान्डस्थित ब्यालमरलमा अरूबाट अलग्गिएर एकान्तवासमा रहेको क्ल्यारन्स हाउसले बताएको छ।
केही हप्तायता उनी धेरै सार्वजनिक कार्यक्रममा सहभागी भएका “कसबाट राजकुमारमा भाइरस सर्‍यो त्यो पत्ता लगाउन सम्भव” नभएको क्ल्यारन्स हाउसको विज्ञप्तिमा उल्लेख छ।
विश्वको वैभवशाली देश बेलायत अनि यहाँको वैभव बोकेको बकिङ्घम प्यालेसका एक महत्त्वपूर्ण सदस्यमा समेत कोरोना भाइरसको संक्रमण हुनुले एक नयाँ सन्देश दिएको छ । कोरोना भाइरसको खतरा र यसप्रति हुनुपर्ने सजगताको निम्ति यो खबरले थप चुनौती दिएको छ ।