प्रतिस्थापन पुजा याना: कंग अजिमायात गमय् बिज्याकल

सुगत रत्न सिन्दुराकार
यें/ येँय् देयया  ऐतिहासिक, धार्मिक मह्वत्वंजा:गु यें महानगर पालिका १९ वडाय् च्वंगु कंग अजिमा देयगलय् अजिमा बिज्याका: प्रतिस्थापन पूजा यात ।
बिसं २०७२ सालया तःभुखाचं स्यंगु उगु देयग: २०७४ सालनिसें पुनःनिर्माण याना वंगु फागुन २८ गते बुधवाः हानं द्यःयात गमय् हे विज्याका प्रतिस्थापन याःगु ख: । देयगः पुनः निर्माण ज्या क्वचायेका: देगलय् गजू छुइया: नितिं गजुलिइ नं प्रतिस्थापन पुजा याःगु् खः ।
प्रतिस्थापनया झ्वलय् बज्रयान विधि विधान कथं मूलाचार्य जुया: सुजिव बज्राचार्य, उपाध्याय जुया: सुरजमुनि बज्राचार्य व कर्माचार्य जुया सुविन बज्राचार्यजुपिन्सं पुजाआजा याना बिज्यागु खः । थुगु पुजाय् जजमान जुयाः कंग अजिमा खलःया नाय: रामकृष्ण महर्जन व खलःया नायका नारायण कृष्ण महर्जनपिं पुजाय् च्वनादीगु खः ।

देयगःया गजू पुजा व द्यः प्रतिस्थापन पुजाया झ्वलय् कंग अजिमा द्यःयात थौं कन्हय् विराजमान यानातःगु सतःया लुखाया न्ह्य:ने खलःया नकिंपाखें लसकुस पुजा यायेगु ज्या जूगु खः । अनंनिसें परम्परागत यतखा त्वाःया श्री कंकेश्वरी दाफा खलः व धिमे बाजं थाना खलःया सकलें जःपिसं लसकुस याना: गमय् बिज्याका पुनःप्रतिस्थापन यायेत देयगलय् बिज्याकुगु खः ।
थ्व झ्वलय् श्री कंग अजिमा दाफा खलः यर्खाया जःपिं मुना न्हिच्छियंक हे अनच्वंगु सतलय् च्वना: दाफा थायेगु ज्या नं जूगु खः ।

ज्याझ्वलय् कंग अजिमा खलःया त्वाः खलःया जःपिंलिसें १९ वडा अध्यक्ष शशीलाल श्रेष्ठ, वडा दुजःपिं चन्द्रमान डंगाल, रेणुकमल शाही, मधु सुदन प्रधानपिनिगु नं उपस्थिति दुगु खः ।
गजू प्रतिस्थापन पुजा याय्त फागुन २७ गते मंगलवाःया न्हि कंग अजिमा देगःया न्ह्य:ने खलःया नाय:पिनिगु उपस्थितिइ क्षमा पुजा याःगु ख: । थुुगु क्षमा पुजाय् नं खलःया नाय: रामकृष्ण महर्जन व नायोका नारायण कृष्ण महर्जनपिन्सं जजमान जुया पुजाय् च्वनादीगु खः ।
कंग अजिमा देयगः पुनःनिर्माण यायेया नितिं बिसं २०७४ साल श्रावण २५ गते कांग्रेसया नेता एवं पूर्व उद्योग मन्त्री नविन्द्रराज जोशी बज्रयान बिधिकथं देगःया शिलान्यास यानादीगु खः ।