इतिल्हने सम्यक झःझः धायेक क्वचाल

सुगतरत्न सिन्दुराकार
नागबहालय् न्यादँय् छक्वः जुइगु इतिल्हने सम्यक महादान पर्व फागुन १५ गते विहिवाःया न्हि तःजिक क्वचाःगु दु । ‘दिपंकर पर्व’ नामं नं प्रचलित थुगु परम्पराय् शाक्यभिक्षु, बज्राचार्यपिंया नापं यल, येँ, ख्वप, किपू, चोभाः लगायत थीथी थासं दीपंकर बुद्ध, अवलोकितेश्वर, बसुन्धरादेवी, आर्यतारा द्यःपिं पुज्यानाः दान प्रदान याना हनेगु याःगु खः । थुकथं हे आपालं भक्तजनपिन्सं दीपंकर तथागतया लिसें सम्यकय् विराजमान जुयाबिज्यापिं द्यःपिन्त पुजाआजाया लिसें थःगु गच्छेकथं दक्षिणा, जाकि। मरीचरी लगायत वस्तु देछाय्गु ज्या नं जूगु खः । इतिल्हने सम्यक महादान पर्वय् १४९ द्यःपिं दुथ्याःगु ग्वसाः खलकं धाःगु दु ।
सम्यक महादान धइगु शुद्ध मनं निःस्वार्थ दान याय्गु व सम्यक सम्बोधि प्राप्त याय्गु लँपु खः धकाः महायान बज्रयान बुद्धधर्मया दर्शनय् न्ह्योथनातःगु दु । सम्यक महादान याय्गु धैगु सम्यक सम्वोधि प्राप्त याय्गुकथं कयातःगुलिं महायान बज्रयान बुद्ध धर्मकथं थुगु ज्या धैगु हे बुद्धो भवेयम् जगतो हितायया रुपय् लानाच्वंगु दु । अर्थात बोधिचित्त उत्पाद याय्गु खः । उकिं म्हिगःया झी पूर्वजपिन्सं थः बुद्ध जुया जगतया हित याय्गु ज्याय् सफलता प्राप्त जुइममा धैगु कामना याना चर्या याय्या नितिं हे थःगु प्रथा न्ह्याका थकूगु खः ।
थ्व पर्वया सार धइगु दानपारमिताया अभ्यास यायगु खः । नाप नापं दान पारमिता पूर्ण याय्त न्ह्यायगु चर्याया रुपय् नं सम्यक दानयात काय्गु याना वयाच्वंगु दु ।
फागुन १४ व १५ गते निन्हुयंक जूगु सम्यकय् महादान पर्वय् बुधबाः वाद्यवादक खलःपुचः मुनेगुनापं यल, येँ, किपू व मेमेगु थासं द्यःपिं यल लाय्कूली मुंकेगु, हिरण्यवर्ण महाविहार, क्वाबहाः आःजुया आगमन, ज्येष्ठवर्ण महाविहारया वसुन्धरादेवी कयाःहयाःलि सकल द्यःपिन्त झ्वःलाक्क बिज्याकाः नागबहालय् लसकुस याय्गु ज्या जूगु खः । मध्य चान्हय् सकल द्यःपालाःपिन्सं पूजा न्ह्याकेधुंकाः सकल द्यःपिन्त चासी देछायेगु ज्या जूगु खः । विहिबाः सुथसिया ३ बजेति हिरण्यवर्ण महाविहारया शाक्यमुनि बुद्ध न्ह्यःने महाद्वीप प्रज्वलन जुल । न्हिनसिया २.३० ताः इलय् लिवाक्क हे हिरण्यवर्ण महाविहारया दशपारमिता व स्थविर आःजुपिन्त लिखा चाय्केगु ज्या जूगु खः । थुकथं हे थुगु हे विहार आःजुया प्रतिनिधिपिन्सं यम्पि महाविहारया आःजुपिन्त लिखा चाय्केगु ज्या नं याय्माःगु परम्परा दुगुकथं उगु ज्या नं जूगु खः ।
अनंलिपा जल धारा हाय्का भूमिशोधन यानाः दशपारमिता आःजुपिंपाखें सम्यक महादान परिसर परिक्रमा याय्गु ज्या क्वचायेवं ईतिल्हने सम्यक महादान बीगु ज्या न्ह्याःगु खः । सनिलया ५ ताः इलय् वसुन्धरादेवी, दीपंकर तथागत बुद्ध, आर्यतारा लगायत सकलें द्यःपिं थःथःगु विहारय् लितयंकाःलि थुगु सम्यक महादान पर्वया विहिवाःया ज्या क्वचाःगु खःसा औपचारिक रुपं इतिल्हने सम्यक महादान पर्व धाःसा यःसिं क्वःथले धुंकाः क्वचाइगु ग्वसाः खलकं धाःगु दु । दान प्रदान याय्त मरि छुइत भुतू दय्केगु, मरि छुइगु, बासुकी नागराज व चम्पक नागराजया ज्यून्यास पूजा, यःसिं थनेगु, हिरण्यवर्ण महाविहारया २० स्थविर आःजुपिंनाप विहार सुधार समितिया पदाधिकारीपिं मुनाः ब्वति काय्माःगु दक्वं बिहारय् निमन्त्रणा बीगु ज्या फागुन १२ गते सोमवाःया न्हि जूगु खः । इतिल्हने सम्यक महादान पर्वया पौराणिक धापू ठकुरी वंशया जुजु भाष्करदेवया सन्तति भरिभारों थःगु दरिद्रता त्वपुइत सौपा मुंकाः धुकुती तयाःगु जुयाच्वन ।
धुकूया ताःचाः सदां थःम्ह घानातइगु व थ्व विषय थःगु जहानयात तकं सुचं मब्यूगु जुयाच्वन । छन्हु बागमती स्नानया नितिं भरिभारो वंबलय् ताःचा त्वःफ्यूगु जुयाच्वन । व हे इलय् जहानं धुकुती सुचुकातःगु छु जुइ धकाः स्वःबलय् लुँया भण्डार खन । थुकिया बारे भरिभारोयात न्यंबलय् भरिभारो नं अजू चाल । धुकुती स्वःबलय् धात्थें लुँ खंबलय् “थ्व दक्वं त्रिरत्नया सुवाःया कारण” जूगु धकाः थः जहानयात कन । थुगु हे धनं सम्यक महादान पर्व शुरु यानाःलि निरन्तरताया लागि गुथि स्थापना यानाः हिरण्यवर्ण महाविहारयात भाला ब्यूगु धापू न्यनेदु । थ्वहे विश्वासया आधारय् गोल्डेन टेम्पलया नामं प्रसिद्ध हिरण्यवर्ण महाविहारया तत्वावधानय् २० स्थवीर आःजुपिन्सं थुगु सम्यक पर्वया ग्वसाः न्यादँय् छक्वः ग्वयावयाच्वंगु ख ।