न्हयस: दँनिसें निरन्तर इतिल्हने सम्यक , फागुन १४ , १५ गते जुइगु !

फागुन १४ व १५ गते इतिल्हने सम्यक महादान न्यायकीगु
यल/ इतिल्हने सम्यकयात कया: यलय् हिरण्यवर्ण महाविहारय् अन्तरक्रियालिसें पत्रकार सम्मेलन ज्याझ्व: जुल।
बज्रयान बुद्ध धर्मया ख्यलय् छगू तःजिकथं न्ह्याना वयाच्वंगु उत्सव इतिल्हने सम्यक पर्व थुगु दँय् ने सं ११४० चिल्लाथ्व तृतिया व चतुर्थी अर्थात वि.सं २०७६ फागुन १४ बुधवाः व १५ गते विहिवाःया न्हि नागबहालय् न्ह्याकीगु जूगु दु । स्वनिगःया देवदेवता बसुन्धरा, आर्यतारा, बोधिसत्व व दीपंकर तथागत लगायत बौद्ध द्यःपिन्त नाग बहालय् ब्वना पुजाआजा याना देयया वज्राचार्य व शाक्यपिन्त सम्यक महादान याइगु जूगु दु । इतिल्हने सम्यक महादान ज्याझ्वःया थीथी पक्षया बारे फागुन ७ तगे बुधवाःया न्हि हिरण्यवर्ण महाविहारय् छगू पत्रकार सम्मेलन याना जानकारी बियादीगु दुृ ।
थुगु सम्यक न्हयस:(७००) दँन्ह्य:निसें निरन्तर न्ह्यानावयाच्वंगु दु । बिसं १८६१ निसें न्यादय् छक: यानाव:गु ख: ।
उगु पत्रकार सम्मेलनय् ग्वसाः खलःया प्रचार प्रसार संयोजक लोकमान शाक्यं फागुन १४ गते बुधबाः बहनी ७ ताः इलय् यल दरवारय् मुना चान्हय् १० ताः इलय् नागबहालय् बिराजमान याकेगु व १५ गते बिहिबाः सम्यक दान यायेगु खँ धयादीगु दु । थुकथं हे पत्रकार सम्मेलनय्  शाक्यं इतिल्हने सम्यक महादानया सांस्कृतिक पक्षयात कया: जानकारी बियादीगु खः । सुजित शाक्यं न्ह्याकादीगु उगु ज्याझ्वलय् ग्वसाः खलःया संयोजक विकासरत्न धाख्वाःं  इतिल्हने सम्यक गुकथं न्ह्याये  त्यंगु दु धैैैगु बारे कनादिल । वय्कलं  थुगुसी सम्यक बारे क्वातुक हे डकुमेन्टेेेशन यायेगु खँ कनादीगु खः । नापं ज्याझ्वलय् पत्रकारपिं सुनिल महर्जन, सुगतरत्न सिन्दुराकार, प्रसान्त माली, विजयरत्न असंवरे लगायतपिन्सं न्यनादीगु थीथी न्ह्यसःया लिसः नं वयकलं बियादीगु खः ।
थुकथं हे चक्रराज बज्राचार्यं सम्यक महादानया झ्वलय् गन गन गुगु पुजाया ज्या न्ह्याकेबलय् स्वस्ति वाचनया लिसें मलास्तव ब्वनेमाःगु खँ दुगु विषयलय् जानकारी बियादिल । थुकथं हे उगु पत्रकार सम्मेलनय् नेवाः पत्रकार राष्टिय दबूया नाय: सुरजवीर बज्राचार्यं थ:पिनि सांस्कृतिक ज्याखँयात क्वातुक प्रचार प्रसार याना वनेमाःगु खँय् ब: बियादिल नाप वय्कलं थ:पिसं मुंकागु सम्पतिमध्ये छुं सम्पति थुकथं सम्यक महादानय् दान याना पुण्य प्राप्त याना वनेगु झीगु चलन दुगु खँ कनादिल । थुकथं हे पुण्यराज बज्राचार्यं सम्यकया थीथी पक्षया बारे जानकारी बियादीगु खः ।
इतिल्हने सम्यक महादान न्यादँय् छकः न्यायकेगु याना वयाच्वंगु दु । थुगु सम्यकया झ्वलय् आपालं पुजाआजाया ज्याखँत चान्हय् याइगु चलन दु ।

किपा: ग्वाहालि : सुगत रत्न सिन्दुराकार