पहिलो पटक ‘अन्तर्राष्ट्रिय मेयर सम्मेलन-२०२०’ हुँदै

काठमाडौं /नेपालमै पहिलो पटक ‘अन्तर्राष्ट्रिय मेयर सम्मेलन-२०२०’ हुने भएको छ । उपत्यका नगरपालिका फोरम, काठमाडौँले नेपालमै पहिलो पटक यस्तो सम्मेलन गर्न लागेको हो ।

उपत्यकाका १८ वटा नगरपालिकाका प्रमुख, उप-प्रमुखहरु संलग्न रहेको नगरपालिका फोरमले आज राजधानीमा पत्रकार सम्मेलन गर्दै ‘नेपाल भ्रमण वर्ष–२०२०’ को अवसर पारेर २०७७ असोज २१ देखि २४ गतेसम्म काठमाडौंमा ‘अन्तर्राष्ट्रिय मेयर सम्मेलन–२०२०’ को आयोजना गर्ने घोषणा गरेको हो ।

‘सम्मेलनमा काठमाडौं उपत्यका भित्रका स्थानीय (नगर) सरकारहरुका विदेशस्थित भगिनी शहरहरु, सार्क तथा दक्षिण/दक्षिणपूर्वी एशियाका राजधानी लगायतका प्रमुख शहर तथा युनेस्को र विश्व सम्पदा शहरहरुको संगठनमा आवद्ध सम्पदा शहरहरुका नगरप्रमुख, नीति–निर्माता एवं योजनाविद्हरुलाई आमन्त्रण गर्ने तयारी गरेका छौँ,’ पत्रकार सम्मेलनमा बोल्दै उपत्यका नगरपालिका फोरमका अध्यक्ष समेत रहनु भएका काठमाडौँ महानगरपालिकामा मेयर विद्यासुन्दर शाक्यले भन्नुभयो, ‘चार दिने सम्मेलनले ‘नेपाल भ्रमण बर्ष–२०२०’ अभियानले निर्दिष्ट गरेको लक्ष्यलाई दरिलो टेवा दिने अपेक्षा गरेका छौँ ।’ शाक्यले भ्रमण वर्षलाई लक्षित गर्दै गर्न लागिएको सम्मेलनले २० लाख पर्यटक भित्र्याउने सरकारी लक्ष्य पुरा गर्न मद्दत पुग्ने पनि अपेक्षा लिएको बताउनुभयो ।