ख्वताबजीको ८०० भागको विशेष कार्यक्रम आयोजना , इमेज च्यानल चाँडै एचडीमा जाने

काठमाडौं /नेपाल भाषाको पहिलो हाँस्यब्यंग टेलि-सिरियल ख्वताबजिले ८०० भाग पूरा गरेको छ ।
इमेज च्यानलबाट प्रसारण भइरहेको यस सिरियलले ८०० भागसम्मको गौरवमय प्रस्तुति गर्न सफल भएको उपलक्ष्यमा आज मंगलबार विशेष कार्यक्रम आयोजना गरियो ।
काठमाडौंको प्याराडाइज बैक्वेटमा इमेज च्यानलका प्रमुख आर.के. मानन्धर , महाप्रबन्धक रघुबरभक्त मानन्धरको उपस्थितिमा  च्यानलले औपचारिक  कार्यक्रम आयोजना गरेको थियो।
इमेज ग्रुप अफ इन्डस्ट्रीजका अध्यक्षसमेत रहनुभएका  इमेज च्यानलका अध्यक्ष आर. के. मानन्धरले केक काटेर कार्यक्रमको खुशीयाली बाँड्ने कार्यको सुभारम्भ गर्नुभएको उक्त कार्यक्रममा  च्यानलका महाप्रबन्धक रघुबरभक्त मानन्धरले नेवा: संस्कृति रक्षा गर्नेेे तथा प्रचार प्रसार गर्ने कार्यमा ” ख्वताबजी” सिरियलले केही मद्दत गर्न सकेकोमा खुशी ब्यक्त गर्नुभयो ।
अध्यक्ष आर. के. मानन्धरले २० वर्ष अगाडि महिनाको ८/१० लाख घाटाबाट सुरु गरेको इमेज च्यानललाई घाटाबाट नाफामा ल्याउन “ख्वतबजि”ले पनि मद्दत गरेको सम्झना गर्दै “दर्शकको माया बढ्दै गएकोले अब चाँडै इमेज च्यानल एचडीमा जानेछ ” भन्नुभयो ।
“इमेज च्यानलको ख्वताबजि ८०० भाग पुग्न सफल भएको सामान्य कुरा हैन । यो सफलता हो ” उहाँले भन्नुभयो ।
८०० भागसम्म आइपुग्दा हजारभन्दा बढी कलाकारले आफ्नो प्रतिभा प्रस्तुत गरिसकेको यो सिरियल नेवार दर्शकमात्र हैन गैर नेवार दर्शक पनि आकर्षण गर्न सफल भएको सिरियल हो ।
ख्वताबजी सिरियलका निर्देशक सुरेन्द्र तुलाधरले ख्वताबजी ८०० भागसम्म निरन्तर चलिरहनु भनेको ऐतिहासिक कुरा हो भन्दै खुशी ब्यक्त गर्नुभयो ।
कार्यक्रममा यस सिरियलशीत आवद्ध कलाकार तथा प्राविधिकहरुलाई पनि सम्मान गरिएको थियो ।