धरान उत्सव आयोजना गरिने

धरान/ धरान सहर स्थापना भएको दिनको स्मरण गर्दै मनाइने धरान दिवस अर्थात धरान डे तीन दिनसम्म उत्सवको रुपमा मनाइने भएको छ ।

पुस २० गते धरान डे मनाउँदै आएकोमा यसपटक धरान उपमहानगरपालिकाले आउँदो पुष १८ गतेदेखि २० गतेसम्म तीन दिन धरान उत्सवको रुपमा मनाउने तयारीमा रहेको छ । नेपाल भ्रमण बर्ष २०२० लाई पनि समेटेर तीन दिने धरान डे उत्सव मनाउन लागिएको हो । धरान उत्सव आयोजना गर्न मेयर तिलक राई संयोजक र उपमेयर मञ्जु भण्डारी सुवेदी सहसंयोजक रहेको मुल समारोह समिति गठन गरिएको छ भने विभिन्न उपसमितिहरु पनि गठन गरिएको उपमहानगरपालिकाले जानकारी दिएको छ ।

स्थानीय पब्लिक उच्च मावि चतरालइनको खेल मैदानमा आयोजना हुनेछ आयोजना गरिने उक्त धरान डे अथवा धरान उत्सवको उद्घाटन प्रदेश १का सभामुख प्रदीपकुमार भण्डारीले गर्नेछन् भने २० गते समापन समारोह मुख्यमन्त्री शेरधन राईको प्रमुख आतिथ्यमा हुनेछ ।
धरान डे उत्सवको अवसरमा ३ दिनसम्म विभिन्न साँस्कृतिक, खेलकुद, मनोरञ्जनात्मक तथा साहित्यिक, सांगीतिक कार्यक्रमहरु आयोजना गरिनेछ । उत्सवस्थलमा शैक्षिक, कला साहित्य, खाद्य प्रर्दशनी तथा बिक्री स्टलहरु पनि राखिनेछ ।