प्रदेश नं ३ को नामांकन र राजधानीको निर्णयप्रति विरोध ! पार्टीकै सांसदलाई समेत अमान्य !

प्रदेश नं ३ को नाम बागमती तथा स्थायी राजधानी हेटौंडामा राख्ने नेकपा सचिवालयले निर्णय गरेपछि सर्वसाधारणमात्र हैन पार्टीकै सांसदहरुले समेत असहमति जनाएका छन् । यस मुद्दालाई लिएर पार्टीभित्रै विवाद पनि सुरु भएको छ ।
पार्टी सचिवालयको यस निर्णयप्रति असहमति रहेका सांसदहरूबीच अनौपचारिक छलफल भइरहेको र यस निर्णयलाई आफूहरुले कसरी हेर्ने भन्ने विषयमा कुराकानी केन्द्रीत भएको बताइएको छ ।
काठमाडौं उपत्यकाबाट निर्वाचित सांसदहरूले यस निर्णयलाई मान्न नसक्ने बिचार राखेका छन् । सचिवालयको यस निर्णयलाई तुरुन्तै बिरोध गरि प्रतिक्रिया नदिएपनि त्यस निर्णयलाई कसरी परिमार्जन गर्न सकिन्छ भन्ने उपाय खोज्नतिर सांसदहरू सक्रिय भएका छ्न् ।
नाम बताउन नचाहने एक सांसदले भने “हामी ३ नं प्रदेशको संसदीय दलको बैठकमा यसको बिरोध गर्ने छौं ।प्रदेशको नाम नेपालमण्डल हुनुपर्ने र राजधानी काभ्रेमा राख्नुपर्ने प्रस्ताव नैं दर्ता भइसकेको बेला सचिवालयले गरेको निर्णय मान्य हुने छैन ।”
“पार्टीको सचिवालयले गरेको निर्णय मान्न सांसदहरू बाध्य छन् तर पार्टीले सांसदहरूको अधिकार कुण्ठित गर्नु पनि हुँदैन ” उनले भने ।
पार्टीले यस प्रकारको निर्णय कुन आधारमा गरेको भन्ने बारे थाहा पाउन आफूहरुले बेग्लै बैठक बोलाउन तयारी समेत गरेको उनले बताए ।
सचिवालयले गरेको निर्णयविरुद्ध पार्टी भित्र नैं आवाज उठाउन तयारी भइरहएको पनि उनले बताए ।
“दुई तिहाई सांसद राजधानी हेटौंडामा हुनुहुन्न भन्ने पक्षमा छन् । “सांसद विशाल खड्काले भने ।
“यो निर्णय बाध्यकारी हैन ।संविधानले नैं प्रदेशको नामाकरण र स्थायी राजधानी चुन्न सांसदहरूलाई स्वविवेक प्रयोग गर्ने अधिकार दिएको छ । त्यसैले यसमा पार्टीको ह्वीप लाग्दैन” उनले दाबी गरे ।
प्रदेश सांसद चन्द्र लामाले भने “पार्टीले गरेको निर्णय संविधानले दिएको अधिकार विपरीत भएकोले यो निर्णय हामी मान्ने छैनौं !”
अहिले ३ नं प्रदेशको नामांकनक र स्थायी राजधानीको सवालमा पार्टी सचिवालयले नै निर्णय गरेर सोही अनुरुप निर्णय गराउन दवाब दिएको बारे नेकपाको सर्वत्र निन्दा भइरहेको छ । यस प्रकारको निर्णयले पार्टी सांसदहरुको समेत अधिकार हनन् भएको मात्र नभइ पार्टीका मतदाताहरु समेत निकै चिढिएको देखिएको छ ।
प्रदेशको केन्द्रमा हजारौं वर्ष पुरानो   “नेपालमण्डल सभ्यता” रहेको कारण “नेपालमण्डल ”  हुनुपर्ने धेरैको जोड रहेको छ । यो नाम संसदमा दर्ता समेत भइसकेको छ ।त्यसैगरी “नेवा: ताम्सालिङ”को माग पनि चर्को रहेको र यो नाम पनि संसदमा दर्ता भइसकेको छ। त्यसैगरी गौरीशंकर र पशुपति पनि दर्ता भएको देखिन्छ ।
यस्तो अवस्थामा यसरी बिचबाटोबाट प्रदेशको नाम बागमती राख्न र हेटौंडा स्थायी  राजधानी बनाउन नेपाल कम्युनिस्ट  पार्टीले निर्णय गरेकोमा प्रदेशवासीहरु असन्तुष्ट र क्रुद्ध समेत भएका छन् ।