“डिभोर्सको समाचार प्रकाशन परिवारको आत्मसम्मान विपरीत “- रामकृष्ण ढकाल

काठमाडौं /लोकप्रिय गायक रामकृष्ण ढकालको पारिवारिक सम्बन्धको बारे विभिन्न मिडियाले समाचार बनाइ रहँदा उनले आफ्नो सामाजिक संजालको पेजबाट आफ्ना दर्शक श्रोतामाझ आफ्नो दाम्पत्य सम्बन्धमा कुनै समस्या नआएको कुरा पोस्ट गरेका छन् । उनले यस्तो समाचार आफ्नो परिवारको आत्मसम्मान विपरीत भएको भनेका छन । सामाजिक संजालमा उनले एक स्टायटसमा लेखेका छन् “जसले जेभने पनि हाम्रो सम्बन्ध कहिल्यै टुट्ने छैन । ” त्यसमा उनले लभ साइन पनि राखेका छन् । अर्को एक अपडेटमा उनले यसरी लेखेका छन् –
“मैले आफुले आफ्नो बोध भएदेखि नै गाउन थालेको हुँ। कति गाएंँ त्यो अंकमा गनेको पनि छैन। जिवनको यो लामो अन्तरालमा मैले कति दर्शक/श्रोता कमाए भन्ने कुराको कहिल्यै लेखाजोखा गरिन तर समय यस्तो ठाउँमा आएर अडिदियो कि हिजोदेखि नेपाली मिडियाले मेरो पारिवारिक विषयलाई शिर्ष समाचार बनाएदेखि मलाई मेरा आफ्ना आलोचक र प्रशंसकहरु  कति रहेछन भन्ने कुराको आभाष भएको छ। सम्पूर्ण  दर्शक श्रोताप्रति सधै कृतज्ञ छु र रहिरहनेछु ।
पछिल्लो समय जसरी मिडियामा म र मेरो जीवन संगिनीको सम्बन्ध विच्छेदलाई लिएर समाचारहरु बनेका छन् ती सबै मेरो परिवारको आत्मसम्मान विपरीत छन ।त्यसैले समाचारलाई विश्वास गरि मेरो परिवार प्रति कुनै पनि नकारात्मक टिप्पणी नगरिदिनु हुन सबैमा अनुरोध गर्दछु। विशेष गरि मेरी श्रीमती निलमलाई जोडेर एक महिलाप्रति को न्यूनतम सम्मान समेतको ख्याल नराखी अत्यन्त निम्नस्तरमा उत्रिएर अनुमानका भरमा कपोलकल्पित भ्रामक अड्कलबाजी र ठोकुवा गरेर उनको चरित्रहत्या हुने गरि प्रतिक्रिया दिनेहरु प्रति खेद प्रकट गर्द्छु । सार्वजनिक चासोको विषय बन्दाबन्दै पनि सबैका आ-आफ्नै पारिवारिक विषय हुन्छन जुन नितान्त व्यक्तिगत हुन्छन ।  व्यक्तिगत विषयमा टिप्पणी, त्यसमा पनि नकारात्मक तरिकाले गर्दा समाचारको केन्द्र बन्ने व्यक्तिलाई कति मानसिक असर पर्छ भन्ने कुरा सबैले सोच्नु पर्ने विषय हो । यसर्थ मप्रति चासो देखाउनु हुने मेरा सम्पुर्ण दर्शक / श्रोतालाई यति कुरा प्रष्ट पार्न चाहन्छु कि आज म जे छु त्यो सबै तपाई सम्पुर्ण दर्शक/ श्रोताका कारण छु तर नेपाली गित संगीत क्षेत्रमा मलाइ अनवरत  रुपमा हिडिरहन प्रेरणा, हौसला र हिम्मत दिने अर्को पाटो मेरी श्रीमती निलम हुन् । हामी सँधै झैँ हाँसी खुशी परिवारमासंँगै छौँ । हाम्रो सम्बन्धमा कुनै चिसो आएको छैन ।
आशा छ तपाईंहरुको माया रहिरहने छ।
सबैको दिन शुभ रहोस! ”
गायक ढकालले यसरी लेखिराख्दा एक सहकर्मी मिडियाले भने उनीहरूको डिभोर्स बारे अदालतले पुुुष्टी गरिसकेको कुरा प्रकाशनमा ल्याएको छ ।