छ्गू कप कफी – चिबाखं

सुधीर ख्वबि

थाय् : क्याफे @ नेक्सस
ई : ह्याउँ सनिल
छ्मा सिमाया कुचाय् त:क्यंका: तयात:गु खा:यागु टेवलया न्ह्यने चुलिंचू जुया फ्यतुनाच्वंपिं निगु मनया दथुइ दु छगू कप, उकि दुने कफि प्याखं हुलाच्वंगु दु । पालंपा: मतिना सवा: हिलाबुला जुयाच्वन निगु म्हुतुसि दथुइ ।
निज्व: मिखा थन्थाय् छ्ज्व: जक थें जुयाच्वंगु अवस्था ख: । निगु मन छगू हे जुयाच्वंगु पला । निगु जिन्दगी छ्गू हे जुइगु तरखरय् दु सायद ।
मौनतायात कुचाथला: कफिया सवा: म्हुतुसिई थीका: धाई – ‘ चिपगु कफिं मतिना झन क्वातुकी नि ।
ओपन माइकय् छ्म्ह कवि कविता वाचन यानाच्वन …
छं थी धुंका
छं थी धुंका
दुने गनं छुंछुं थथे ह्व:गु ख:
गथे कि न्हापांगु थीमज्यु लिपा जोवन मुसुक्क ह्वै …
……..
……..
धत् !
मछामजूम्ह जादुगर
धात्थें ! जित: छाय् थथे थियागु ?
थुलि साक्क व स्याक्क !……..
कफि फुइधुंकल । मन जा:गु मदुनि । प्वंगु कपय् किनाच्वंगु म्हुतुसिया थिया व सा:गु सवा: अझ नं ल्यँ हे दनिगु जुया जुइ सायद । अथेजुया प्वंगु कप सां पालंपा: म्हुतुसि म्हुतुसि दथुइ हिलाबुला जुयातुं च्वन। जुयाच्वन तुं च्वन ।