नेवाः पत्रकार राष्ट्रिय दबूया स्वक्व:गु तःमुज्या क्वचाल ,न्हूम्ह नायः सुरजवीर

यें/नेवाः पत्रकार राष्ट्रिय दबूया स्वक्वःगु तःमुँज्यां म्हिग: कार्तिक ३० गते शनिबा: क्वचाल ।त:मुंज्यां अन्तिम इलय् सहमतिइ वना: नाय: पदय् सुरजवीर बज्राचार्य  ल्यःगु दु ।
सहमति कथं न्वकू नृपेन्द्रलाल श्रेष्ठ, रचना श्रेष्ठ व सन्दिप श्रेष्ठयात ल्यःगु दु । अथेहे मू छ्याञ्जे सुनील महर्जन, छ्याञ्जे केके मानन्धर, ल्यूछ्याञ्जे राजु नापित व प्रेरणा शाक्य ल्यःगु ख:  । सहमति कथं हे दांभरिं सुरेन्द्रभक्त श्रेष्ठ व ल्यू दांभरिं बाबुकाजी साछेँ श्रेष्ठयात नं ल्यःगु ख:।
पूूूर्ण रुपं न्हूगु केन्द्रीय कमिटी हे सहमति जूूूकथं हे मूदुजलय् नविन जोशी, विजयराम कर्माचार्य, भाइकाजी महर्जन, विराजकाजी राजोपाध्याय, प्रजित शाक्य, पूर्णभक्त दुवाल, अनुप प्रधान, तेजनारायण महर्जन, विगेन तुलाधर व श्याम तण्डुकारपिंन्त ल्यःगु ख: धा:सा मिसा दुजलय् मीना वज्राचार्य, हसना लवजु, रुबि श्रेष्ठ, सुनीता महर्जन, अनिता डंगोल व नीशा श्रेष्ठपिन्त ल्यःगु ख: ।
दबूया निवर्तमान नायः श्रीकृष्ण महर्जनयात सल्लाहकारय् ल्यःगु  ख: । अथेेेहे प्रदेश १ या संयोजक भोजराज श्रेष्ठ व प्रदेश ४ या संयोजक उत्तम श्रेष्ठयात ल्यःगु ख: ।
दबूया त:मुंज्या उद्घाटन  प्रदेशया निम्ह सांसदपिं राजेश शाक्य व जीवन डंगोलपिन्सं त्वाः देवा च्याकाः मंकाःरुपं यानादीगु खः । मूपाहांकथं यें महानगर पालिकाया मेयर विद्यासुन्दर शाक्य झायादीगु ख:।
पाहांंकथं झायादिइपिं नेपाल आदिवासी जनजाति महासंघया वरिष्ठ न्वकु गजुरधन राई, नेपाल प्रेस काउन्सिलया कार्यवाहक नाय: किशोर श्रेष्ठ, सल्लाहकार विजयरत्न असंबरेपिसं   तःमुंँज्याया सफलताया कामना यासें  भिंतुना  न्वचू  बियादिइगु  खः ।
नेवाः पत्रकार राष्ट्रिय दबूया नाय: श्रीकृष्ण महर्जनया नाय:सुइ जूगु थुगु ज्याझ्वलय् दबूया मूछ्याञ्जे सुनिल महर्जनं लसकुस न्वचु बियादीगु खः ।
थ्व हे झ्वलय् न्यागु बिधाया पत्रकारिता सिरपा ल:ल्हायेगु ज्याझ्व: नं जूगु ख: । यें महानगर  पालिकाया मेयर विद्यासुन्दर शाक्यं न्याम्ह पत्रकारपिन्त उगु सिरपा ल:ल्हानादीगु ख: । थ्व पालय्  सिरपा लःल्हाय्गु  शताब्दी  पुरुष सत्यमोहन जोशी पत्रकारिता सिरपा वरिष्ठ पत्रकार व साहित्यकार काभ्रेया मोहन दुवालयात, बाबुराजा ज्यापु फोटो पत्रकारिता सिरपा थिमिया रत्नकृष्ण श्रेष्ठ्यात, भिक्षु कुमार काश्यप लुमन्ति पत्रकारिता सिरपा हिमेशरत्न बज्राचार्ययात व ज्ञानदेवी मणिरत्न स्थापित लुमन्ति पत्रकारिता सिरपा धरानया याम प्रधानयात ज्ञानज्योति लक्ष्मीप्रभा लुमन्ति पत्रकारिता सिरपा वरिष्ठ पत्रकार एवं साहित्यकार अमृतलाल श्रेष्ठयात ल:ल्हा:गु खः।