जर्मनीइ न्हूदँया लसताय् नेवाः भ्वय् व सांस्कृतिक ज्याझ्वः

फ्रयांकफर्त जर्मनी / पासा पुचः जर्मनीया ग्वसालय नेपाल संवत ११४० न्हूदंया लसताय जर्मनया फ्रयांकफर्तय नेवा भोय व नेवा सांस्कृतिक ज्याझो नेपाल संवत ११४० या कछलाथो पंचमि (२ नोभेम्बर २०१९) कुन्हुं न्हूदं नापं दकले न्हापांगु नेवा भोय व नेवा सांस्कृतिक ज्याझो तजिक कोचाल ।
जर्मनया थी थी थासं नेवा व गैर नेवा नापं जर्मनतयसं नं ब्वति कागु उगु ज्याझोलय थी थी बाजंत थाना मे हाला सांस्कृतिक ज्याझोत नं न्ह्यब्वयेगु ज्या जूगु ख ।
ज्याझोलय नेपाल संवत ११४० या लसताय भिंतुना देच्छासें सकसितं लसकुस यायेगु ज्या पासा पुच जर्मनीया नायो भाजु शंकर महर्जनजुं यानदिगु ख । थगु देसं तापालय थ्यनाच्वंपिं झीगु न्हू पुस्ताया काय म्ह्यायपिंत नं झीगु थपिनिगु मांभाय नेपालभाषा, झीगु तजिलजि संस्कार संस्कृतिया ज्याखं सीके सयेके बीत थौंया थो ज्याझो याना च्वनागु खं भाजु महर्जनं धयादिगु ख ।
नेवा भोय व नेवा नसा त्वंसा व नेवा सगंया छु गज्यागु महत्व व बिषेशता दु धयागु खं नं वयकलं पुवंक ब्याख्या याना न्यंकादिगु ख । फ्रयांकफर्तय दकले न्हापां नेवा भोय व नेवा सांस्कृतिक ज्याझो याये खना थपिं नापं पासा पुच जर्मनीया सकलें दुजपिं तसकं लयतायागु खं नं वयकलं धयादिगु ख ।
उगु ज्याझोलय मू पाहां कथं नेदरलन्दं झायादिम्ह वर्ल्ड नेवा अर्गनाइजेशनया संस्थापक नायो अले सल्लाहकार डाक्टर भाजु बाल गोपाल श्रेष्ठजुं नेवा भोयया महत्वया बारे थुइकेगु नापं नेपाल संवतया इतिहास कुलेगु ज्या नं याना दिगु खः । देसया नामं हे निस्वनातगु नेपाल संवत विश्वय गनं मदु कथंया छगू संवत खः धयागु ध्वाथुइकुसें ११४० दं ताहाकगु इतिहास ज्वनाच्वंगु नेपाल संवत धयागु नेवातयगु जक संवत धयागु भ्रमय सुं नं च्वने मज्युगु खं वयकलं धयादिगु ख ।

थगु देश नेपालया नामं दुगु संवत मछ्योसें भारतं आयातित विक्रम संवत छेला च्वनेगु धयागु नेपाया राष्ट्रियता नितिं छतिं लोगु खं मखु धयादिसें नेपाल सरकारं नेपाया राष्ट्रियताया नितिं नं नेपाल संवतयात सरकारि ज्याखंय छेलाबुलाय हयेमागु खंय ब बियादिगु ख ।
वयकलं विश्व न्यंक थ्यनाच्वंपिं नेवातय दथुइ थःथवय बिचा कालबिल यायेत व अधिकारं बंचित जुइका च्वनेमापिं नेपाया नेवातय हक हित अधिकारया निंतिं स तयेत वर्ल्ड नेवा अर्गनाइजेशन गठन जूगु खं धयादिसें विश्व न्यंकया नेवात छधि छपं जुइमागु खं नं कुलादिगु खः ।
हलया मूलुखां दुहां वलिसें पाहांपिंत नेवा पहलं धौसिन्हं तिका ह्यांगु व तुयूगु कापया कोखां कोखायेका खेंसगं बिया लसकुस याना दुकायेगु यागु उगु ज्याझोलय लाभा, पालु, हाकुमुस्या, छोयला तया समयजोलं नापं दायेका ला, आलु अचार,आलुछ्वं, मिक्वा, मस्यांक्वा, फसिक्वा, लइसुकु, भुतन,वाउंचा,पाउंचा, धौ, सिसाबुसा निसें सकतां घासा तया नेवा लप्ते भोय नके ज्या जूगु व पाहांपिंत कंयया सोमां सलिंचाय नेवा थों लुना त्वंकेगु नं यागु ख ।
नेवात जक मखु राइ, लिम्बु, तामागं, गुरुगं, ब्रम्हु, क्षेत्री आदि नेपाया थीथी जातजातिया मनूत नापं जर्मनत याना स्वसम्हं मयाक मनूतयसं ब्वतिकागु थ्व ज्याझोलय मयजुपिं सानु महर्जन व अर्पणा डंगोलपिसं सांस्कृतिक ज्याझो न्ह्याकादिगु ख ।
नेपाल भाषा मथुपिंत थुइकेत दथुइ दथुइ खय, जर्मन व अंग्रेजी भाय छेलानं नेपाल भासां हे सांस्कृतिक ज्याझो न्ह्याकूगुयात नं सकस्यां च्वछागु ख ।
नेवा भाय नापं खस भाय व अंग्रेजि भायया मे जक मखु थी थी कथंया हुला प्याखंतयसं नं ज्याझोयात अझ अप्व न्ह्याइपुका ब्युगु खः ।
धिमे थाना लाखे प्याखं ल्हुइका हल चाहुला न्ह्याकुगु थ्व ज्याझोलय जर्मनीया नचाम्ह मिसा कलाकार मयजु फ्रान्जि त्रोम्मरं नेवा वस पुना बांसुरी पुया व रोबर्त भाजुं सितार थाना मालश्री धुन न्यंकूगु खसा, मयजु सानु महर्जनं भाजु संयुक्त श्रेष्ठं दयेकादिगु नेपाल संवतया संस्थापक शंखधरया प्याखंया मे हाला प्याखं हुलादिगु ख ।
आपालं मचा व ल्यायम्ह ल्यासें कलाकारपिसं कथक लिसें राजामति वा मतिना याये वा, सिर्साया हेकु, सिमा कचा चुलि जा थें जाल जोबन व मेमेगु थीथी नेवा मेया लसय यैइपुक हुंला प्याखं केनेगु ज्या नं अन जूगु ख ।
मंचय सुं नं पाहापिंत आसन ग्रहण याका खाता कोखायेकेगु वा सुयातं राजनैतिक भाषण याकेगु ज्या मजूगु उगु विशुद्ध नेवा भोय व नेवा सांस्कृतिक ज्याझोलय फ्रयांकफर्तय हे दीपिं नेपाली व्यावसायी व एनआरएनया नकितिनिं न्हू निर्वाचित नायो भाजु कुमार पन्त, एनआरएनया पुलांम्ह नायो जिबा लामिछानेपिसं नं थ परिवार सहित ब्वति कयादिगु ख । वयकपिनि तिरि मयजुपिसं नं नेवा वस पुना ज्याझोलय ब्वति कयादिगु नं न्ह्यथने बहजु ।
सांस्कृतिक ज्याझो तालाकेत जर्मनया थीथी थासं व लन्डनं नं झापिं इजि ब्यान्ड (Easy Band) पुचयापिं खगेन लिम्बु – गितार, धुर्व शाक्य – बेस गितार, रविन्द्र श्रेष्ठ- ड्रम, अले विक्रम गोपालि, किरण श्रेष्ठ, चन्द्र श्रेष्ठ व सुलता राइ पिसं थीथी मे हाला न्यंकूगु खः । वयकपिसं नेवा खय व अंग्रेजी याना स्वंगू भायया मे हाला सकसितं न्ह्याइपुक प्याखं नं ल्हुइकुगु ख ।

मे हालेगु जक मखु लाखे जुया नं प्याखं हुलादिम्ह भाजु चन्द्र श्रेष्ठं खस भायया वारि जमुना पारि जमुना मेया लसय नेवा मे हाला न्यंका सकसितं न्ह्याइपुक प्याखं ल्हुइकुगु खः । अथेहे निकिल कारंजितं धिमे व मेमेगु नेवा बाजंत थाना सांस्कृतिक ज्याझो अझ अप्व झझ धायेकादिगु खः ।
नीन्याम्हेसिया पुचलं पासा पुच जर्मनी निस्वना न्यायेकुगु थ्व ज्याझो थुलि ता लाकेत नसात्वंसा जोरे यायेगुलिं मयजुपिं नानु महर्जन, ईला श्रेष्ठ व भाजु सन्तोष अर्यालपिनि ग्वाहालि कया हामा कथं भाला कयादिम्ह मयजु म्रिस्तिना महर्जन (Yummy Food World) ख ।
अथेहे नायो भाजु शंकर महर्जनयात ग्वाहालि यानादिपिं भाजुपिं चैत्य रत्न कंसाकार व जगत जोशी खः ।न्हिनसिया प्यता इलं निसें न्ह्यागु ज्याझो बहनिसिया झिंछता इलय तिनि क्वचागु जुसां सकसिनं साक्क भोय नया यइपुक प्याखं हुला न्ह्याइपुकुगु खः ।

युट्युब लिंक