मूर्त/अमूर्त सम्पदा ब्वज्या “किलाघः महोत्सव” जुइगु!

यें /भिंतुना सनिल व किलागल महोत्सवया ग्वसाः ग्वयागु खँ पत्रकार सम्मेलन याना: जानकारी बिइगु ज्याझ्व: जुगु दु ।
१८ वडा दुनेया सकल नागरिकपिन्त सहभागी याकाः मूर्त अमूर्त सम्पदा न्ह्यब्वयेगु  व नेपाल पर्यटन बर्ष २०२०यात प्रवर्धन यायेत थुगु महोत्सवया ग्वसाः ग्वयागु खँ १८ वडा अध्यक्ष भाजु न्हुछेकाजी  महर्जनं जानकारी बियादीगु ख:। यें महानगर पालिकाया सम्पदा तथा पर्यटन समितिया संयोजक नापं जुयादीम्ह वयकलंं  थुगु ज्याझ्वः किलाघःनिसें न्यत तक करीव २०० मिटर सडकय् महोत्सव जुइगु नं जानकारी बियादीगु ख: । थ्वयां न्ह्य: थौने न्यतय् व नौने बुरांख्यलय् सांस्कृतिक ज्याझ्व: जुइ धुंकूगु दु ।
महोत्सव ३० गते शनिवाः सुथसिया ८ ताःनिसें न्ह्याइगु जूगु दुसा थुगु अवसरय् किलागलय् वडाया वजेटं पुनःनिर्माण याःगु पीगं अजिमा देगः, नासः चुकय् दाछी अप्पाया पःखा व मूर्ति भण्डारण तयेगु क्वथा लगायतया संरचना येँ महानगरपालिकाया मेयर विद्यासुृन्दर शाक्यपाखें उलेज्या याकेगु नं योजना दयेकातःगु दु ।
न्हिनसिया १ ताः निसें अमूर्त सम्पदाया संरक्षक गुठी खलःपिन्सं थःथःगु मौलिक बाजं प्रदर्शन, बाद्य शैली तथा नृत्य प्रस्तुत याइगु खँया नं जानकारी भाजु महर्जनं बियादीगु दु । । थुकथंया सांंस्कृतिक ज्याझ्वलय् परम्परागत ङत त्वाः, किलाघः त्वाः, त्यंग त्वाः, त्यंग कुमा खलः व ङत तुलाधर समिति थें जागु संस्थागत सहभागिता जुइगु खँ धाःगु दु । थुकथं हे थुगु महोत्सवय् वडाय् बसोबास यानाच्वंपिं कलाकारपिनिगु नं थीथीकथंया कला प्रस्तुति याइगु जूगु दु ।
महोत्सव न्ह्याकेया नितिं वडाया लिसें महानगरया सम्पदा तथा पर्यटन विभाग मार्फत माःकथंया खर्चया व्यवस्थापन यानागु खँ नं कनादीगु दु । ज्याझ्वःया व्यवस्थापन धाःसा किलाघः त्वाः व किलाघः त्वाः मिसा पुचःपाखे. जुइगु जूगु दु ।
थुगु महोत्सव स्व:झायेत ग्वसा: खलकं इनाप नंं याःगु दुु ।समाचार ग्वहालि:वसुगत रत्न सिन्दुराकार