नेदरलन्दय म्हपुजा व न्हूदं ११४०

आमस्तरदम,नेदरलन्द /नेपाल संवत ११४० कछला पारु (२९ अक्टुबर २०१९) कुन्हु दयदसं थें थुगुसि नं वर्ल्ड नेवा अर्गनाइजेशन नेदरलन्द कचाया गोसालय नेदरलन्द आमस्तरदमया मिलिंगनहोफय न्ह्याइपुक म्हपुजा याना न्हूदं हनेगु ज्या जुल ।
म्हपुजा यायेत नेदरलन्दया थीथी थासं नेवात व विदेशीत नं अन मुनेज्या जूगु ख । अन मुंपिं मनू म्ह पतिकं पोताय मन्द चोया मत च्याका सकसितं जजंकोखा कोखायेका सि सगं, मरिचरि व खें सगं बिया म्हपुजा यायेगु ज्या नितु श्रेष्ठयात पासा कया श्रीलक्ष्मी श्रेष्ठं यानादिगु ख ।

थःथवय न्हूदंया भिंतुना कालबिल यायेगु नापं म्हपुजा कोचायेका नेवा भोय नयेगु ज्या नं अन जूगु खः । झझ धायेक थुगुसिया म्हपुजा ताःलाकेत बिरेन श्रेष्ठ, सुरेश श्रेष्ठ, बिनोद श्रेष्ठ, मधु श्रेष्ठ, आशिका श्रेष्ठ, सुभद्रा श्रेष्ठ, सुजिब श्रेष्ठ, आशिस राजभण्डारी, श्रृष्ति श्रेष्ठ, नुग श्रेष्ठ आदि सकस्यां ग्वाहालि याना यानादिगु खः ।
वर्ल्ड नेवा अर्गनाइजेशनया संस्थापक नायो अले सल्लाहकार भाजु बालगोपाल श्रेष्ठ नं उपस्थित जुयादिगु उगु ज्याझोलय म्हपुजा व नेपाल संवतया महत्वया बारे ध्वाथुइकेगु ज्या नं वयकलं याना दिगु खः ।
भाजु बिरेन श्रेष्ठया नायो सुइ वर्ल्ड नेवा अर्गनाइजेशन नेदरलन्द कचा सामाजिक संस्था कथं दर्ता यायेगु ज्या कोचागु खं नं उगुज्या झोलय भाजु बिरेन श्रेष्ठं धयादिगु ख । बिधान दयेका नेदरलन्दया कानुन कथं आधिकारिक दर्ताया यायेत छु गज्यागु प्रक्रिया नालेमाल धयागु खं सचीव भाजु नुग श्रेष्ठ कनादिगु ख ।