टुँडिखेलमा रहेको दुईमाजु मन्दिर अतिक्रमण गरी राखिएका पसल हटाउन गुठीको पत्र

गुठीको जग्गामा पसल सञ्चालन गर्न गुठी संस्थानले २०७५ सालमा नै अमृता भट्टराईलाई महिनाको १५ हजार तिर्ने करार गराएर पाँच वर्षमा मन्दिरमा व्यापार गर्न भाडामा दिएको देखिन्छ। तर, भट्टराईले सम्झौता विपरीत अरुलाई मन्दिर परिसरमा व्यापार गर्न दिएर आफूले मासिक रुपमा धेरै भाडा असुल्ने गरेको खुलेको थियो।

भट्टराई गुठी संस्थानले मन्दिर सरसफाइ गर्ने दायित्व दिएकी कर्मचारी थिइन्। उनलाई दुईमाजु मन्दिरमा व्यापार गर्न दिन काठमाडौं महानगरपालिकाका प्रमुख विद्यासुन्दर शाक्यको समेत संलग्नता रहेको स्थानीयले दाबी गर्दै आएका छन्।

चौतर्फी विरोधपछि गुठीसँग मन्दिर परिसरमा व्यवसाय सञ्चालन गर्न सम्झौता गरेकी अमृता भट्टराईले सम्झौता खारेज गर्न निवेदन दिएकी थिइन्। निवेदन बमोजिम सम्झौता खारेज भइसकेको जनाउँदै गुठी संस्थानले मन्दिर परिसरबाट पसल हटाउने निर्णय गरेको हो।

मन्दिर परिसरकै कुरुप देखिने गरि पसल राखिएपछि स्थानीयले विरोध गर्दै आएका थिए। तिहारपछि पसलहरु हटाउने सहमति भएपनि हालसम्म पसलहरु यथावत् रुपमा नै संचालन हुँदै आएको छ।

त्यसैले गुठी संस्थानले जिल्ला प्रशासन कार्यालय, काठमाडौं र काठमाडौं महानगरपालिकालाई पत्र काटेर मन्दिर खाली गराउन र धार्मिक स्थान संरक्षण गर्ने कार्यमा आवश्यक शान्ति सुरक्षा कायम गर्न अनुरोध गरेको छ।

पढ्नुस् : खुल्लामञ्चपछि मल्ल राजाको देवाली मन्दिर ‘दुईमाजु’ अतिक्रमणमा, साँघुरिँदै टुँडिखेल

वैशाख १४ गते शनिवार खुल्लामञ्च परिसरमा अवैध रुपमा बनाइएका ४० वटा सटरहरु भत्काइको थियो। त्यसबेला समेत खड्गीले दुईमाजु मन्दिरमा पसल राख्ने कार्यको विरोध भएको थियो। केही समयपछि सञ्चालक आफैंले पसल हटाएका थिए। तर, ६ महिनापछि फेरि दुईमाजु परिसरमा पसलहरु राखिएको थियो।

दुईमाजुका साथै खुल्लामञ्च अतिक्रमण भएको विरोधमा आगामी शनिवार ‘अकुपाइ टुँडिखेल’ आयोजना हुँदैछ। त्यस अन्तर्गत बिहान ८ बजेदेखि १० बजेसम्म मानव साङ्लो बनाएर रत्नपार्क देखि खुल्लमञ्च र सैनिक मञ्चबीचको बाटोसम्म ‘टुँडिखेल अकुपाइ’ गर्ने कार्यक्रम रहेको छ।

source:pahilopost