आखिर मध्यरातमा फैलिएको गन्ध के पोलेको गन्ध रहेछ त ?

१९ कात्तिक, काठमाडौं । सोमबार मध्यरातमा काठमाडौं उपत्यकाका विभिन्न स्थानमा एक्कासी पोलेको चर्को गन्ध आयो । ललितपुरको एकान्तकुना, कुसुन्ती, सातदोबाटो, काठमाडौंको तीनकुने, बानेश्वर लगायतका क्षेत्रमा मानिसहरुले एक्कासी केही पोलेको जस्तो गन्ध आएको बताएका छन् ।
तर के पोलेको भन्ने थाहा भएन ।
प्रहरीकाअनुसार पछिल्ला दिनहरुमा मासु पोलेको जस्तो गन्ध आएको भन्दै महानगरीय प्रहरी वृत्त सातदोबाटोमा गुनासो आउने गरेको थियो ।
सोमबार राति फेरि चर्को गन्ध आएको भन्दै स्थानीय आए । त्यसपछि स्थानीय र प्रहरीको टोली नख्खु खोला किनारमा केही जलाएको छ कि भन्दै खोजेको थियो । त्यसक्रममा बोरा जलाएको भेटियो ।
बाराभित्र भैंसी तथा राँगाको हड्डी र छाला राखेको पाइएको छ । त्यही जलाएको गन्ध राति फैलिएको पाइएको छ ।
सातदोबाटा प्रहरीका प्रमुख डीएपी गौतम मिश्र भन्छन्, ‘झण्डै आधा ट्याक्टर जस्तो हड्डी तथा छाला जलाएका रहेछन् ।’
जसरी हड्डी तथा छाला जलाउने कार्यमा संलग्न रहेको आरोपमा प्रहरीले तीन जना पक्राउ परेका छन् ।
पक्राउ पर्नेमा फेसल मुस्लिम, साजित मुस्लिम र रजिश शेर्पा छन् ।
उनीहरुलाई कुन कानून अन्तरगत कारबाही गर्ने भन्ने विषयमा सरकारी वकिलको कार्यालयको राय लिइएको थियो । वातावरण प्रदुषण ऐनअनुसार कारबाही गर्नुपर्ने राय आएपछि काठमाडौं महानगरपालिकामा पठाइएको महानगरीय प्रहरी परिसर ललितपुरका प्रमुख एसएसपी टेकप्रसाद राईले जानकारी दिए ।
Source :onlinekhabar