नेपाल–अफ्रिका फिल्म महोत्सवमा १२ देश

काठमाडौँ / फिल्म संस्कृति आदन–प्रदानको ध्येयले हरेक वर्ष हुँदै आएको ‘नेपाल अफ्रिका फिल्म महोत्सव’ का लागि विभिन्न १२ देशबाट फिचर, सर्ट र डकुमेन्ट्री गरी २५ फिल्म छनोटमा परेका छन् ।
राजधानीको जमलस्थित राष्ट्रिय नाचघरमा कात्तिक १६ देखि हुने तीनदिने महोत्सवमा नाइजेरिया, केन्या, घाना, दक्षिण अफ्रिका, मलावी, जिम्बावे, सेनेगल, इजिप्ट र नेपालमा बनेका फिल्महरू देखाइने आयोजकले बताएको छ ।नेपालबाट पर्यटन बोर्डले बनाएको ‘नेपाल : ल्यान्ड अफ डाइभर्सिटी’, सुमा सापकोटाको ‘पाखुरे’, सिर्जना ताबेबुङको ‘देवकी’, सुनील पाण्डेको ‘अनन्त यात्रा’, सुमन सापकोटाको ‘लस्ट स्टार्स’, निमबहादुर बस्नेतको ‘हलो’, अनुराधा आत्रेयको ‘अर्धलिखित’, गणेशजंग रावलको ‘भोक’, आशीष भण्डारीको ‘पेन्सिल’, पर्यटन बोर्डकै ‘नेपाल मोन्टाज’, महेश दाहालको ‘रिभर्स’, महेश्वर सम्बाहाम्फे ‘नाम्लो’ लगायत छानिएका छन् । कलेज अफ जर्नालिज्म एन्ड मास कम्युनिकेसनले गर्दै आएको महोत्सवमा यसपटक बेलायत र जर्मनको फिल्म पनि हेर्न पाइने महोत्सव अध्यक्ष मञ्ज मिश्रले बताइन् ।
स्वदेशी र अफ्रिकी फिल्म प्रदर्शन गरिने दक्षिण एसियाकै यो पहिलो फिल्म महोत्सव भएको उनले दाबी गरिन् । अफ्रिकाका कतिपय विपन्न मुलुक र नेपालको अवस्थासँगै फिल्म निर्माणको अवस्था पनि उस्तै रहेकाले ७ वर्ष अघिबाट महोत्सव सुरु गरिएको अध्यक्ष मिश्रले बताइन् ।
महोत्सवअन्तर्गत यसपटक ‘नेपाल–अफ्रिका चलचित्र कार्यशाला’ पनि राखिएको महोत्सव
निर्देशक डब्बु क्षत्रीले जनाए । चलचित्र विकास बोर्डको सहकार्य रहेको महोत्सवले फिल्मी ज्ञान आदानप्रदानमा सघाउने बोर्ड अध्यक्ष केशव भट्टराईले बताए ।