नेवा: पत्रकारको अधिबेशन हुँदै , अध्यक्षका लागि दुईको दाबी

दुई प्यानल चुनावी मैदानमा
अन्तिम समयसम्म सहमति गर्ने प्रयास जारी

काठमाडौं /देशभरिका नेवा: पत्रकारहरुको संगठन , नेवा: पत्रकार राष्ट्रिय दबूको अधिबेशन भोलि  कार्तिक ३० गते शनिबार  काठमाडौंमा हुन गइरहेको छ ।
यस अधिवेशनमा दुई प्यानल चुनावी प्रतिस्पर्धाको निम्ति तयार भएको देखिएको छ ।
वर्तमान उपाध्यक्षहरु नृपेन्द्र लाल श्रेष्ठ र सुरजवीर वज्राचार्य अध्यक्ष पदका दावेदारको रुपमा देखिएका छन् भने दुबैले प्यानल बनाइ चुनावमा जानको निम्ति तयारी गरिरहेको बुझिएको छ । नृपेन्द्रलाल पक्षले वर्तमान महासचिव सुनील महर्जन ,कोषाध्यक्ष सुरेन्द्रभक्त श्रेष्ठलाई सोही पदमा अगाडी सारेको छ। उता सुरजवीर वज्राचार्यको प्यानलले वर्तमान सचिव केके मानन्धर महासचिव र पहिलो कार्यकालको कोषाध्यक्ष रमेश मानन्धरलाई कोषाध्यक्षको रुपमा अगाडि ल्याएको छ ।
वर्तमान अध्यक्ष श्रीकृष्ण महर्जनले सकेसम्म सहमतिमा जाने र अन्तिम विकल्प भनेको लोकतान्त्रिक पद्धतिको चुनाव हुने बताएको छ ।
लामो समयसम्मको सहमतिको प्रयास हुँदाहुँदै पनि यसरी दुइ प्यानल स्पष्ट देखिएको छ भने अन्तिम समयसम्म सहमतिको लागि प्रयास गर्ने, एउटा मिलन बिन्दुको खोजी कार्य भइरहेको पनि थाहा हुन आएको छ ।