आखे

छवालं सत्यनारायणया धलं दनेगु जुयाः श्रीमैंयाया लिमलाः । मामं व थ्व मदयेक ज्या वानाच्वनीगु। श्रीमैंया नं पलख धका: सुम्क च्वनेगु बानि मदु। लक्षिण लाःम्ह व ज्या फुक्क यायेस:म्ह श्रीमैंया।

“अय् श्रीमैं, थौं आखेय् ल्य न्हिं” भुतुली च्वनाः ताय् सियाच्वंम्ह श्रीमैंयात मामं धाल ।

“ज्यू ज्यू, जिं स्वयाः या हे याये नि, गुलि जक पारापारा हाला च्वनेफु थ्व मां नं ।”

श्रीमैंयां मांम्हेसित लिस: बिल । म्ह्याय् निम्ह जक श्रीमैंयाया मांम्हेसिया । तताम्ह न्हापा हे गलैंचा थायेगु ज्या यानाच्वंबलय् थ:गु त्वालय् बालं च्वनाच्वंम्ह थान्का च्वैम्ह सँय् छम्हेसिके बिस्युं वन। गुलितक ला श्रीमैंयाया मांम्हं थ:गु न्हाय् ध्यनावंम्ह धका: छेँय् तकं दुमका थ: त:धिम्ह म्ह्याय्‌यात । श्रीमैंयाया अबुया सरकारी ज्याकुथि जूगुलिं छेँय् नयेत्वनेया छुं म्ह्वति मजू । अय्‌नं दुम्ह तता ब्याहाः यानावंबलय् छेँय् स्वयेगु निसें छेँया सकतां ज्या यायेगु फुक्क भाला श्रीमैंयाया छ्यनय् । मांम्हसिया बुँज्या यायां लिमलाः । थ: मांअबुयात नयेगु त्वनेगु व छेँय्या फुक ज्या श्रीमैंयां याना वयाच्वन। अय्‌नं थौं मांअबुयात व चीधिम्ह म्ह्याय् उलि उत्ति ग्यं मजू । गुलाब स्वांमाय् कं थें ।

नकतिनि झिंच्यादँ दुबलय् श्रीमैंयाया नं तसकं य:म्ह मिजं छम्ह दुगु ख: । निम्हेसियां नापं च्वने नापं म्वाये धैगु बचं तक नं ल्हायेधुकूपिं । याकनं ब्याहाः याये धा:गु नं ख:, अय्‌नं श्रीमैंया थ: ब्याहाः यानाः वनकि थ: मांअबुयात स्वः मदइभनं श्रीमैंयां ब्याहाः यायेत भतिचा ई पीत उब्लय् धा:गु नं ख:।

श्रीमैंयाया तताया ब्याहाः जुयाः गुलिचा मदुवं तताया थान्का च्वैम्ह भाःतम्हेसित छम्ह अमेरिकनं अमेरिका ब्वनायंकल। छकलं श्रीमैंयाया तताम्हेसिया न्हिं हिल। निम्हं अमेरिका वन। लिपा जूलिसे मांअबुयात नं व त:धिम्ह म्ह्याय् मिखाया फुति थें जुल ।

ई बिना वनाच्वंन। थौं श्रीमैंया पीदँ दयेधुंकल । कन्हय् थ: तता अमेरिकां लिहां वैगु थ्व हे पाखय् स्वयाः श्रीमैंयाया मामं छवाः लिपा सत्यनारायण धलं दनेत्यंगु । उकें श्रीमैंयाया मांया तुति तकं बँय् मचू । उगु इलय् व त्वालं थथे अमेरिकाय् वनां च्वंवंपिं सुं मदुनि । थ: म्ह्याय् व जिलाजं अमेरिकां लिहां वयाः थ:छेँय् हे च्वं वैगु जुयाः नं मामं धलं दनाः प्रसाद नकेत थ:थिति व त्वा: बहा:या सकसितं ब्वनात:गु दु ।

श्रीमैंयां ताय् सी धुंकल । आखेय् ल्ययेत छपाः हासाय् वा तल अले ल्वहंमाया मचां तीजक घिरिघिरि यानाः आखेय् पिकाल । बांलाक आखेय् ल्यल । गुलि यचुसे च्वंगु आखेय् । आखेय् ल्यये क्वचायेवं छग: सिसी दुने तयाबिल । यचुसे पिचुसे च्वंगु, बाग: धैगु हे मदुगु पूर्णताया प्रतिक आखेय् ।

“जिं नं व रमेशयात थ्व आखेय् थें निश्चल व शुद्ध मतिना यानागु हे ख: । व प्रति समर्पित जुयाः जिं मतिना यानागु हे ख: । उलितक जिं ययेकाः नं भतिचा ई पी मफुम्ह व, वं धायेखतं जिं जिमि मांअबु त्वःताः वलिसे ब्याहाः याये मफुत धायेवं वं मेम्ह ब्याहाः यात, व नं थ:गु त्वालय् भट्टी पस: तैच्वंम्हेसिया म्ह्याय् हं। जित: त्व:ता मेम्ह ब्याहा: यायेत वं सच्छिगु बहाना दयेकल। थजाःगु नं वैगु मतिना खः ला ?” श्रीमैंया आखेय् ल्यल्यं थ:गु मतिना आखेय् नापं दानास्वत । मांअबु धका: ब्याहाः मयासें च्वनानं थौं मांअबुयात थ: मिखाया कुं थें स्वयेय:गु मखु । बुगाँय् ल: बुयावथें थ: तताया जक बखान यायां मफु मांअबुया । श्रीमैंयां थ: य:म्ह रमेश लुमंकल न्हापाया खँ लुमंकल अले मिखां ख्वबि हायेकल । श्रीमैंया तीजक ल्यूने अंगलय् म्ह दिका मिखा तिसित । उब्लय् सुनां न्व:वाना ह:गु थें जुल श्रीमैंयायात–

“त्व:ता: वनीम्ह मनुखं सच्छिगू त्वह: चिना: मखुगु खँ ल्हानाच्वनी । आखिर व हे वनीम्हेसित ल्हा: ज्वनातयेगु नं बेकार, उकें छगू त्वह: चिना: छं वैगु ल्हा: त्व:ताब्यु।” श्रीमैंया झसंग वन । वं उखेथुखे स्वल सुं मखं ल्हातय् हासा दु अले हासाय् द्यःने शुद्ध, निश्चल, निर्मल व पूर्णताया प्रतिक आखेय् !