तिनतिकः महाबिकः ( बाखंचा)

मथुरा साय्‌मि

पर्बः च्वकाय् सिमा छमा दु । किन्नर-लोक ।लुॅया स्याउ छगः अन सिमाय् सयाच्वंगु दु । सकसिनं खन । सकसियां मिखा वन । व न्हापा वनेला , थ्व न्हापा वनेला । घ्वात्तुमतु घ्वाः। सकसियां ल्वःवं । ध्वाखा धाःसा उजुंसुजुं चायेकाब्यूगु हे मखु । ध्वाखा छु चायेकल , छथाय् हे च्वंपिं स्वम्ह दाजुकिजापिं छपाखं पाहाः गःवन । स्वारास्वारां थाहाॅवन । व स्वयाः व न्हापा लाके थे , व स्वयाः व । भाताभातां वन ।हि-चःति हायावल । स्वांस्वांवल । सेंसेंमिन । उमिसं वास्ताइस्ता हे मतल । केवल न्हापलाक्क थ्यंके । स्याउ खानाः स्वथने । स्वम्हसियां ध्याउना उलि हे जुल । चःति नाःनाः वयाः म्ह छम्हं प्याःसां उमिसं वास्ता मतल । छाति पम्हुइ थे ध्वाकाध्वाका मिनाः सासः हे ल्हाये थाकुसां म्वायसे धाल । लक्ष केवल छगू हे सकसियां । न्हापलाक्क थ्यंकाः स्याउ छगलं थम्हं स्वथने । पर्बः च्वकाय् थ्यंमथ्यं वल । स्वम्हं भःभःन्हुल । स्याउ दु छगः । सुनां थ्वइगु खः , मन पिपिच्यात । भचा न्ह्यथ्याम्हेसित क्वय् च्वंपिं निम्हसिनं तुति ज्वनाः साल । व भुगूक दल । निम्हसिनं वयात त्यत्तुमतु हे त्यल । स्वम्हं अन हे ग्वाराग्वारा चिन । न दने फु, न थाहाॅ वने फत । स्वम्हं अन हे तत्तुमतु क्यनाच्वन । पाखं थाहाॅ वयाच्वंपिं सू सु मेपिं ह्वासाह्वासां थाहाॅवल । च्वकाय् थ्यंकाः स्याउ चबुक्क थ्वयाकाल । हरररं न्हिल । स्वम्हं दाजुकिजात अले थिथि ख्वाः स्वयाः भुगलुंच्वन !!! ( सन्दर्भ: बर्तमान निर्वाचन)                                        feature photo : vector stock