दायरीया दुरु !

रिता महर्जन

नकतिनि पिहां वनेस:म्ह जि । जिमि मामं ज्या या:गु मचानिसें स्वयाच्वनाम्ह जि । मचाबलय् निसें छेँय् दुने नं ज्या याकाच्वनी जिमि मामं जिमित । उब्लय् मस्तय्‌त नं ज्या याकेगु संस्कार। थ्व संस्कार तसकं बांलाःगु संस्कार ख: ।
जि नं मचासां पिहां वने सल। नकतिनि न्यादँ खुदँ दुगु ई । छन्हु जिमि मामं जितः सुथय् न्हापां च्या त्वनेत दुरु कायेके छ्वल । जितः बांलाक लुमं उब्लय् दुरुया भा: स्वतका । जितः स्वतका ध्यबा व दुरुया सिसि बियाः मामं धाल
– ध्यबा तनी न्हिं, बांलाक दां ल्हातय् प्व: चिना यंकि । हानं दुरुया सिसि तज्याइ, सिसि नं बांलाक ज्वना हुँ । मामं लिसा काकां धाल ।
जिं ज्यू धया: प्लास्टिकया म्हिचाय् सिसि तया: न्यासि चाचां पिहां वना। उब्लय् निगू स्वंगू त्वा:यात छथाय् दुरु बिइगु जूगुलिं दुरु न्यायेथाय् तसकं म्वः म्वः । झ्वः हे गन थ्यने धुंकल । जि नं झ्वः छू वना । झ्वलय् दना च्वनाबलय् छम्ह म्ह मस्यूम्ह खय्‌नी छम्ह जिथाय् न्ह्यःने वयाः धाल
– नानी तिम्रो सिसि मलाई देउ मेरो सिसि तिमीलाई दिन्छु । एकछिनमा तिम्रो सिसि तिमीलाई नै दिन्छु है ।
जि ला न्हापां दुरु काः वनाम्ह । छुं स्यूगु नं मखु। जिं व मिसां धाः थें जिगु सिसि दुगु प्लास्टिकया म्हिचा वैत बिया वं जितः थ:गु सिसि दुगु प्लास्टिकया म्हिचा जितः बिल अले व मिसा छकलं गन वन वन जिं मखन । दुरु गाडी थ्यंकः वल । व मिसां जिगु सिसि ज्वनावंम्ह लिहां व:गु मखु। जि ला वाथावाथा कंम्ह थें जुल।
जि नापं झ्वलय् दनाच्वपिं मां तःमांपिन्स “अय् मैं व म्हिचाय् दुने स्व सा। व मिसा ला गन वन वन।” धाल।
जिं प्लास्टिकया म्हिचा चायेका स्वया “का बर्बाद जुल । सिसि ला तज्या:गु का खनिं” सकस्यां व मिसायात न्वात । जि ला छु याये छु याये जुल । छेँय् दुरु ज्वना मवनकि मामं छु याइगु खः ! जिगु मिखां ला ख्वबि बा: वल । मचाया बुद्धि ला ख: । अले मेपिन्सं जितः खँ स्यन
-छंगु दुरु कायेगु पा: वैबलय् जिमिसं नं सिसि न्ह्यच्याके उब्लय् छं थ्व तज्या:गु सिसि बास्केतय् तयाब्यु । व पस: साहुया ल्हातय् बिइ मते न्हिं ।
दुरु कायेगु जिगु पा: वल । जिगु ल्हा थुरुथुरु खानाच्वन । जिं तःमांपिन्सं धाः थें ग्याग्यां याना । अय्‌नं पस: साहुनं सिसि स्वयेत्यंबलय् जिं ध्यबा बियाः दुरु सिसि कया: ब्वाँय् वया । जितः उगु इलय् जिं महाभारतया युद्ध त्याका थें जुल । जिं दुरु ज्वनाः छेँय् वना च्वनाबलय् जितः जि जिम्मेवार जुइसःम्ह मचा थें ताल । जिं मचायेक जिगु न्हाय् तपु जुयावल ।