लुमन्ती “गथांमुग: नख:”

रिता महर्जन

मचाबलय् जितः य:गु नख: मध्येय् ख: गथांमुग नख:। थौंया न्हिनसं सकसिगु छेँय् पत्तिं न्ह्यय्‌पं कथिइ न्ह्याय्‌कं, मल्ता, बकं (मेगु छु छु ख: ल्वःमनं) चिनाः पिने लुखाय् खाया तै। थ्व न्ह्याय्‌पं कथिइ त्वालय् सकसिगु छेँय् खायातैगु जुयाः स्वये न्ह्याइपुसे च्वं। बहनी व न्ह्याय्‌पं कथिइ हलूया लप्तेय् समय्‌बजि चिनाः छ्वालि च्याकाः जिमि दाइनं छ्वासय् वान्छ्वये यंकी। अले जिमित नं समय्‌बजि नकी जिमि मामं।
थौंया न्हिइ त्वा:या दुवातय् वाउँगु न्हाय्‌पं कथिया कतांमरि थें दयेकाः उकेय् हासाया ख्वाःपा: दयेकाः भ्यग: छग: नं तयातै। व छु ख: जिं मस्यू अय्‌नं उकेय् जिमि ततां दयेका तैगु बां बांला:गु काप:या कतांमरित फुक्क खायेयंकी। व काप:या कतांमरित यंकीबलय् जितः तसकं नुग: मछिनीगु लुमं जि।
थौंया न्हिसं लैंचामा व फितिकिरी ल्वाकछ्यानाः व लैंचा ल्हातय् तयेगु। थुगु न्हिसं जि सिबें तःधिकःपिं ततापिनि लिलाइ हे मखु। त्वालय् वय्‌कःपिनिगु गतिविधि स्वयाच्वनेगु उगु इलय् तसकं न्ह्याइपु ।
थथे जि मचाबलय् तकनं गथांमुगः न्ह्याइपुसे च्वं। थौंकन्हय् व इलय्‌या न्ह्याइपुगु गथांमुगः दनि ला मन्त व चाहिँ मसिल अय्‌नं जिगु थौंया न्हिया नख: जिगु ल्वःमंके मफुगु लुमन्ति (memory) जुयाः जिगु नुगलय् सदां थानाच्वन।