आतंङ्क !!!

एम्बुलेन्सया तिक्खरगु सलं जि न्ह्यलंचाल । धारमय् सः ताय् मदयावन । अंगः घडी मिखा जूवन । सुथसिया प्यताः क्यनाच्वन । दनेगु ई नं जुइन । न्ह्यः वइख्वाः मवल । फ्यतुना । न्ह्यःनेसं खायातयागु मास्कं छकःनिं न्हाय् म्हुतु त्वपुया । म्हगसय् म्हंगु छकः लुमंका । सीपिं सीपिं हे जक म्हनाच्वनीगु थौकन्हे । लाफःहिफः खायातःगु जक खनाच्वनीगु । लुमंके हे मयः दः । छकः मिखा तिस्सिना।

दना । बाथरूम वना । क्वथाय् वयाः हानं ग्वतुलाच्वने मयल । झ्याःया पर्दा छकः चीका । लॅ सुंसां दं। दुवातय् नं मनू छम्हं खने मदुनि । झिंझां दं । लासाय् हे फ्यतूवया ।

मोबाइल कया । स्वःस्वःथाय् ल्वयया खॅ । अस्पताल अस्पतालया खॅ । सकलें गाउन गाउनय् । म्हसीके मफु मनूत । सासः ल्हाये मफयाः वाथावाथा कनाच्वंपिं ल्वगित । सीपिं ल्ह्ययाच्वंगु स्टेचर स्टेचर । लास च्यानाच्वंगु लु । लॅय् लॅय् , बॅय् बॅय् । गुलि जक स्वये । छु जक स्वयाच्वने । मस्वसें नं मन मच्वं । अयनं मोबाइल अफ हे यानाछ्वया । पिपिच्याः मन । भाराभारा मिं नुगःपा । ध्वाकाध्वाका सं नुगःचु । ग्याःगु नं छुभनं जक थ्व । धेक्कार थ्व मास्क नं । छाय् तयाच्वंगु जुइ जिं थन । थ्व सुं मदुगु क्वथाय् याकःचा च्वनेत नं मास्क ? न्हिलेला ख्वयेला । न न्हिले फु न ख्वये हे फु जि ।

सुं दंगु मखुनि।थः छम्ह जक दनाच्वनां छु याये । लासाय् हे ग्वतुलाछ्वया । मोबाइल हे चायेकाः स्वया । ल्वय् झन तच्वयां वयाच्वन। झन यक्व यक्वसित पुना वनाच्वन । संक्रमणया ल्याखं सर्गः थी थे च्वन । नेपालय् नं भारतय् थे हे जुयावल । थन नं झन झन ग्यानापुया वल । अस्पतालय् बिरामीत तयेत थाय् मन्त । लॅय् लॅय् तयाः वासः याये मालाच्वन । लॅय् लॅय् हे तयाः वासः याये धाःसां ताः मलानाच्वन । सासः ल्हाकातयत बिरामीयात अक्सिजन हे मदयाच्वन। लाःलाः थे जुयाच्वन ब्यबस्था। आइ सी यू क्वथाय् तयमाःपिन्त क्वथा हे मदयाच्वन । क्वथा दुथाय् भेन्टिलेटर मदयाच्वन। ल्वचंकःपिं सासः ल्हाये मफयाः वाथावाथा कनाः सिना वनाच्वन । जः परिवारपिं भःभःन्हुयाः ख्वयाच्वन ,” का रे , का रे ,का रे ।”

देशया हामा जुयाच्वंपिं , शासन यानाच्वंपिं नेतानेतात धाःपिं सकलें बिश्वासया मत कायेत उखेंथुखें ब्वाॅय् ब्वाॅय् जुयाच्वन । थःथः हालाच्वन । थःथः हे ल्वानाच्वन । थःथःगु हे स्वार्थय् सत्ताधारीत लिमलाः फमलाः जुयाच्वन — छखे जक स्वकातःपिं सलत थे ।

थुखेर थुन्नांथुन्नां चुयाः जनता सकलें सी-बच्छि म्वाय्-बच्छि जुयाः म्वानाच्वन । चिल्लाय्-मिल्लाय् दनाच्वन । उखेर हामात ताख्वाॅय् जुयाच्वन; त्वर्कां जुयाच्वन । जिं मोबाइल ध्याप्प तिनाछ्वया । जुरूक्क दना ।

पिनेंवःगु एम्बुलेन्सया साइरन-सलं जिगु क्वथा हानं दिररर मिन । सी-बाजं थ्वःथे उस्सुसे उस्सुसे च्वनावल । जिगु म्हय् न्ह्यानाच्वंगु सासः हे थप्प दिनाब्यू थे च्वनावन । बः मदयक धस्वाना च्वनाम्ह बुॅ-ख्याःचा थे च्वनावल जि !!!!