बुंगद्यःया रथया बाँयम्वः व प्यम्ह नारायणद्यः भिंकेज्याया नितिं क्षमा पुजा !

यल, माघ २५/  यलया बुंगद्यःया रथया बाँयम्वः व प्यम्ह नारायणद्यःया मर्मतया लागि क्षमा पुजा जुगु दु। बाँयम्वः व उकिइ क्वय् प्यम्ह नारायणद्यःया प्रतिक कथं तइगु सिँया त्वाकःया मर्मतया लागि म्हिगः यलया तःबहाय् क्षमा पुजा जुगु खः।

बाँयम्वःया क्वय् चाँगु नारायण, विशंखु नारायण , शेष नारायण व इचंगु नारायणद्यःया प्रतिक कथं तइगु सिँया त्वाःक तसंक जिर्ण जुगुलिइ तदँ न्हय् निसें मर्मत यायेगु लागि खँ जुयाच्वंगुलिइ २०७८ या बुंगद्यःया रथजात्राया लागि क्वचायेकुगु कथं सहलह जुगुलिइ म्हिग क्षमा पुजा जुगु रथ दयेकेज्याय् सलंग्न सिँज्या कमि नायः दिलकुमार बाराहीं धयादिल। प्यम्ह नारायणद्यःया प्रतिकलिसें बाँयम्वःया दथुइ तइगु सिँ नं हिलेत तयारी जुगु दु। थुकिया लागि सिँ फायेगु लिसें फुक्क ज्या यायेत तयारी जुगु दु।

म्हिग जुगु क्षमा पुजाय् रथ दयेकेज्याय् संलग्न यवाः व बाराही गुथियारतयगु ब्वति दुगु खः।(साभार:नेपालमण्डल टिभी)