सुमनया नस्वाः – चिबाखं

किशोर धुस:

सुमन छम्ह गथु मयजु छगू बाहालय् पिनेसं डाला व हासाय् तया न्हिथं स्वां मीगु बनेज्या यानाच्वनी । फुथे मफुथे म्ह्याय् नस्वाः यात आखः ब्वंकातल , आः तधी जुया कलेज नं वनीम्ह जुल । सुथसिया कलेज क्लास क्वचायका छेँ लिहाँ वयाखतं जाथुया मां-बौपिं लिसे ख्याः खँ ल्हाल्हां जा नै । थथे हे याना दिन न्ह्यानाच्वनी । म्ह्यायम्ह नस्वाःलं धाई = यमां कन्हे छुं जुया जि लिहाँ वये लिबाःसा मांपिं जा बुकाः नया च्वँ न्हि धाइ । मांम्ह लिसःब्युब्युं धाइ= म्वाःगु खँल्हानाच्वनी ! कन्हे सन्चर्वाः जिं मस्यू धया अप्व जितः झुके यायेत स्वयाच्वनी , खूब ख्यायाये माला वः का छं । हाकन नस्वाःलं धाइ = कन्हे मखु कंस धयागु का ! मांम्ह छुनं धाइमखु । धाइथें गबलें लिबाःनं मजू नस्वाः ताईमय् कलेजं लिहाँवया न्ह्याबलें थम्हं हे जा बुका: जा नैम्ह खः उखुनु अथें जुल । कन्हेखुनु सन्चर्वाः सुथय् न्हापन मांम्ह सुमन न्हिथं थें स्वां व डाला , हासा ज्वना द्यःथाय् वनेत धाइ =का जि वनेत्यल छं छुछु यायेमामाःगु याना जा बुकाःच्वं धया वनी । नस्वाःया च्या त्वना पासाथाय् वना: १० बजेति ल्याँ वया जा बुकाःतै । मांम्ह वयेवं धाई = जिला थौं उषाचा व नजला थाय् वना ल्याँवया जा बुकाः ठिक्क यानातये धुन मां धाधां स्वम्हेसियां तले वनाः जा जि तानां नयेमाःगु नये नी सिधेकी । भाःतम्ह किसनचा जा नये धुनेवं छझाः सुमन लिसे गफसफ याई पलख जायवं पिहाँवनी , वनकि बहनि लिब्बाक छेँ दुहाँ वयेगु बानी । गबलें गबलें ला छ्येँ दुहाँ हे मवंसे सुमनया स्वाँ मीगु थासय् हे लिक्क च्वंगु फल्चाय् ग्वारातुला चा कटेयाई । सुथ न्हापनं सुमन वयवं किसनचा हथायचाचां धाराय् ख्वा सिलाः च्या कयाहया त्वंके है । वया सुमन तस्कँ हे यः तर द्यःख्युँसे च्वनावलकि त्वनेमास्तेवैगु , मन पिपिच्याइगु बानी छगु जक मज्यु । अथेला किसनचा सुमनयात तस्कँ माया याइम्ह नं खः थ्व खँय् छुनं धायथाय् मदु उकिं किसनचितः गबलें ब्वःबीमखु माक्व खर्च नं बिया तै परिवार मिलेचले जुयाच्वन । छन्हु स्वाँ मीगु क्वचायका छेँवना जा जि नयेसिधेका कःसिइ निभाले च्वनां क्वसं च्वंगु थःगु क्यबचाय् मिखा ब्वयका गफ यानाच्वन । आकाझाकां अथेथथे हे धाये मफेक छेँ हुस्लुं पुया है , छगुनिगु हे खँ धायमलाक पखाले फ्यतुनाच्वंम्ह किसनचा थःगु क्यबचाय् कुतूंवन । नस्वाः धाःसा जानयधुनेवं पासापिन्थाय् वनावये धया पिहाँ वंम्ह द्वाहाँमवःनि आ छुयायउ आ छुयायउ ??? धाधां हे सुमन मुर्छा हे जुल , लीपा हाकनं छेँ हुस्लुं पुइकूगु चाहे मचाल ।
लीपा नस्वाः द्वाहां वयका याये माःगु थः बौयागु कृयाकर्म फुक्क याना मांम्ह घेपुनां च्वनाच्वन । धाधांमधां लाबला दिन बिनावन अले नस्वाः क्याम्पस वनेगु नं सुरुजुल । छन्हु
सुमन या नस्वाः लिहाँ मवःनि धया वइगु लँस्वयाच्वन वःगु जकहे मखु उखें वैथे थुखें वैथे मन पिपिच्याका च्वन ।
म्ह्यायया पासापिं उजलापिं वया नस्वाःया मां छु हालत जुयाच्वन ज्वी धया बिचाः याःवल । मांम्हसितः (मां मां थन स्वसाः नस्वाः लिहाँ वैमखुत आः , वला मलेसिया वनेधुंकल का )

यल