नेपाल संवत् ११४१ या भर्चुअल सभा जुइगु !

यें/ नेपाल संबत् ११४१ न्हूदँ मंका भर्चुअल भिंतुना सभा आ वइगु कौला गा चर्‍हे (कार्तिक २९ गते) शनिबाः न्हिनसिया २ः०० ता इलय् थिमि ब्यान्क्वेट, थिमिइ जुइत्यंगु दु । सँस्कृतिबिद्लिसें नेपाल संबत् या थीथी पक्षयात कयाः अनुसन्धान न्ह्याकावयाच्वनादिइम्ह काशिनाथ तमोतया मू पाहाँसुइ न्ह्याइगु थुगु मंका सभां नेपाल संबत् न्हूदँ राष्ट्रिय समारोह समिति ११४१, नेवाः देय् दबू, राष्ट्रिय बिभुति शंखधर प्रतिष्ठान, नेपालभाषा मंका खलः, नेपालभाषा मंका खलः यल, न्हूदँ समारोह समिति यलया मंका ग्वसालय् जुइत्यंगु खः । मंका भर्चुअल भिंतुना सभा नेवाः युट्युबया फेसबुक पेजपाखें प्रत्यक्ष प्रसारण जुइत्यंगु दु ।
कोरोना महामारीया हुनिं थुगुसिइ न्हूदँया साँस्कृतिक र्‍याली लिसें म्वः म्वः मनू छथाय् मुनाः जुइगु छुं नं उत्सब समारोह सम्भव मदुगु इलय् नेपाल संबत् आन्दोलनया न्ह्यलुवा खलःपिनिगु थुगु मकां सभां नेपाल संबत् यात आन्दोलन कथं हनेमाःगु सन्देश बिइगु तातुना तःगु खनेदु । थुगु मंका सभां राज्यं नेपाल संबत् यात कयाः यानाच्वंगु व्यवहारय् दुगु मगामचाः उला क्यनेगु लिसें नेपाल संबत् हनावयाच्वंंपि खलः पुचःपिनिगु एकताया नितिं तिबः जुइगु ग्वसाः खलकं आसा यानाच्वंगु खनेदु ।
छुं न्हिं न्ह्यो तिनि थुगु हे मंका: ग्वसा खलकं मंका: अपिल पिथनाः नेपाल संबत् या न्हूदँ कछलाथ्व पारु (मंसिर १ गते) हे म्वः म्वः मनू ममुसे सञ्चार माध्यमपाखें ब्यापक प्रचार प्रसार यानाः हनेत इनाप याःगु खः । मंका अपिलय् स्वन्ति नखःया झ्वलय् नेवाःतय्सं हनावयाच्वंगु नेपाल संबत् न्हूदँ, म्हपुजा व किजापुजाया तिथि मितिइ एकरुपता खनेमदयाच्वंगु खँय् थः थःवय् आरोप प्रत्यारोप यानाः मनमुताब पिमथनेत इनाप यानातःगु खः ।