याकः बखुं – चिबाखं

दिब्या बज्राचार्य

छगु तःधंगु कःसी छम्ह बखुं उखें थुकें जुया च्वन । चसीचाम्ह व बखुंया म्ह सुकु नं मदु थेँ च्वँ ।
थौं सुथँनिसे सर्गतय् सुपाँय् जायकः वयाच्वन उकिंयानाः लकस खिउँसे च्वं । वा फुतिफुति नं वल । बखुंचाः घौछी उखे थुखे जुया च्वंबलय् छम्ह तःग्वाराम्ह बखुं चसीचाम्हः बखुंया ल्यू ल्यू वन । बखुं भतिचा ग्याकल । हानं घौछी जायका मेम्ह बखुं वइ । व नं व हे बखुं ल्यू ल्यू वनी । ,
पलख पलख पाक्क अन कःसी यक्व तःग्वारापिं बखुंत व छम्ह चसीचाम्ह बखुँया ल्यू ल्यू न्ह्यो न्ह्यो जुयाच्वनी । चसीचाम्ह बखुंयात चितासू हे ब्यूगु मखु । गन गन वन अनहे लिना यंका च्वनी । छम्ह विधुवा मिसाया ल्यू ल्यू समाजय च्वंपिं कुविचार दुपिं मनूत थें ।
लिपा व बखुंचा अन च्वने हे मफूत ।
वं इमित छलय् यानाः अन कःसिं ब्वया वनी ।
अनं लिपा व कःसिं मेपिं बखुंत मवल ।
म्वायेकं बखुंत पिहाँ हे मवल ।