खसु -चिबाखं

ध्रुव मधिकर्मी

थबले हे पुलिस छम्ह त्यानु चाचां ब्वाँय् ब्वाँय् वल । जिगु न्ह्योने थ्यनेवं भचा याउँ ख्वाः वयेका: दित । भचा झासु लन ।
पलख लिपा वं जिके न्यन — थनं नकतिनि सुं मनू बिस्यु वंगु खनाला ?
भचा न्ह्यो ला मखना ।
गबले खनाले ?, वं जिके भचा ख्वाः चकंका न्यन ।
दत जुइ बाछि लछिति ।
खय्फु खय्फु उबले हे जुइ ।
वं जितः धाल — वया वसतय् हिभ्याः किनाच्वंगु दइ, अले ब्वहलय् पाछाय्माःगु झोला फित्ता चब्वुगुलिं ल्हातं याकुप्वालय् स्वब्यानातगु दइ, फित्ता हे मच्युसें लाकां न्ह्यानात:गु, सँ छ्यनामत:म्ह अले भचा ग्या ग्यां बिस्युं व:गु जुइ खला ? अँ, अले वया ख्वालय् भचा कचिघाःख्व नं दु ।
पुलिसया ल्हातय् चब्बुगु फित्ता छहाक:, हिभ्या: क्यूगु चक्कु, मोजा छपा अले कोट छपा अले मेगु छतानिता नं छुं ज्वलं दु । वं जितः क्यना धाल — स्युला छं , थ्व व हे पापी हत्यारा, मयबलं याइम्हसिया दसिज्वलं का ।
धा ? व गुखे बिस्युं वन ?, पुलिसं जिके न्यन ।
जिं बाछिति न्ह्यो खनागु लु लुमंका पुलिसयात व मनू वंगु लँ क्यना ।
जिं क्यनागु लँय् जुयाच्वंपिं म्वःम्वः मनूतय्त चिइकुं चिइकुं पुलिस हत्यारा माःवन । अले थबले हे जिं अन छक्वलं खसु भुंगु खन ।