न्हिले ला ख्वये ला !

– मथुरा सायमि
बौ-म्ह्याय् निम्ह क:सी गलैँचा छपातय् च्वना: निभा: पानाच्वना। चिकुला मजुनिसां सुथय् चिचिधाल। वया लुसि चायेतेन। जिं पत्रिका पुइके तेना।
“सु वल थें कुने। छक: स्वया वा कामना” जिं म्ह्याय् यात कुने वना: छक: स्व:वनेत धया।
म्ह्याय् नं न्हाय्पं बिया: न्यन। “खला बा:, मखुथें”
“ख: ख: हुँ” जिं न्वाना ।
“छु धायेगुले वैत?”
सुं नापनिप लाये मखु धासां मज्यू। सुं सुं वया हे च्वनी। मनू वइगु धयागु हे ल्वय् हइगु। थ: पिहाँ मवनां छु याये। वइपिं मनूत थथे फात्ताफुत्त वया हे च्वनीगु। छु यायेगु का:।
“कि बा: पिहाँ झाल धायेला?” कामनां न्यन।
“जिउ जिउ का। आम्थे हे धा। सुं नापलाना च्वने मखुत। मथ्यूतले मथ्यू। थिलकी ला थ्यू हे वइनि भाइरसं। ६० कतय् जुपिन्त उप्व खतरा धाल। जिला झन ८० कतय् जुइ धुकुम्ह बुरा। अले?”
म्ह्याय् कुहाँ वन। जिं ननिमवासे पत्रिका स्वया। भचा जायवं म्ह्याय् मयजु थाहाँ वया धाल, “बा: कुनेला सुं मदु। सुं व:गु हे मखु।”
जिला वाताहाँ जुल। न्हाय्पनं मतायावन जक धायेगु !
अयसा नमवा:गु स: नं जिं गथे ता:गु ?
द: न्हिले ला ख्वये ला जुल।